Wir Jörg von gots gnaden Kunig zu Beheim Marggraue zu Merhern Herczog zu Luczemburg vnd Slesien vnd Marggraue
zu Lusa(cz) Bekennen vnd tun kundt offenlich mit diesem brieue vor allermeniglich Wiewol wir von angeborner mildikeit vnd auch von kuniglich(er)
wirdikeit wegen dorein wir von gotlicher schickung als wir hoffen gesaczt sein allen vnd iglichen vnsers kunigreichs vnderthanen vnd getrewen nucze
vnd fromen zu bestellen geneigt sind Idoch erkennen wir wol das wir meher pflichtig sein allen den die vnns vnd der Crone zu Behemen vor andern
leutten mit ganzen trewen gedinth haben vnd mit trewen meynen vnd furbasz willig bereyt sind zuthun Wann vns nu die Ersamen Burgermeister
vnd Ratmanne vnd ganzen gemeine vnser Stad Budissin durch Ir Erber potschaft demutiglichen gebeten haben das wir Ine der Stat Budissin
vnd iren nachkomen zwey dorffer genant Conewitz vnd Cromenforst gnediglichen geruchten erblich zugeben vnd zuaignen Des haben wir angesehen
soliche Ire demutige vnd vleissige bete auch betrachter nucze stete trew vnd willig dienst die die vorgenant(e)n von Budissin vns(er)n vorfarn kunigen vnns
vnd der Crone zu Beheim offt getrewlich vnd nuczlich gethan haben vnd hinfur tun sollen vnd mugen inkunftigen zeiten Vnd haben dorumb mit wol
bedachtem mute gutem Rate vnd rechter wissen den vorgenant(e)n Burgermeistern Rate vnd Burgern gemeinglichen der Stat Budissin vnd iren nach
komen soliche dorffer Conewitz vnd Cromenforst mit allen herlikeiten freiheiten zinsen Eckern wisen weyden holczern teichen vnd allen zu vnd eingeho
rungen gnediglichen erblichen gegeben vnd zugeaigent geben vnd zuaigen Ine die von kuniglicher macht Incraft dicz brieues dieselben dorffer In zuha
ben der gebrauchen vnd geniessen sollen vnd mugen von allermeniglich vngehindert Doch so ziehen wir in denselben dorffern ausz die hochsten gerichte
vnd die slosz rent wie Im lande geburlichen die sollen bey dem slosz zu Budissin in massen das von alter herkomen ist beleiben Vnd wollen das die
Stat derselben dorfferhalben mitleydung mit der manschaft haben sollen Dorumb gebieten wir allen vnd iglichen vns(er)n Amptleuten die yecz da oder
hinfur sein werden vns(er)n lieben getrewen das sie die benant(e)n vnser Burger bey solichen iren gerechtikeiten hanthaben vnd dobey bleiben lassen dawider
nicht thun noch nyemandes zuthun gestatten bey vermeydung vnser sweren vngnaden Mit vrkundt dicz brieues versigelt mit vnns(er)m kuniglichen an
hangendem Insigel Geben zu Prag am Montag nach sand Dionisien tag Nach Cristi gepurt Vierzchenhundert vnd dornach Im Sechsund
sechczigisten Vnnsers Reichs Im Newnden Jare