Wir Rudolff der Ander von Gottes gnaden Erwelter Römischer Kayser zu allen zeitten
mehrer des Reichs, In Germanien, zu Hungarn, Behaim, Dalmatien, Croatien, unnd Sclavonien König, Ertzhertzog zu Osterreich, Hertzog zu Burgundi, zu Brabandt, zu Steyr, zu
Kärndten, zu Crain, zu Lützenburg, zu Würtemberg, Ober unnd Nider Schlesien, Fürst zu Schwaben, Marggraff des Heyligen Römischen Reichs zu Burgaw, zu Mährern, zu Ober unnd Nider
Laußnitz, Gefürsteter Graff zu Habspurg, zu Tyrol, zu Pffirt, zu Kyburg unnd zu Görtz, Landtgraff in Elsaß, Herr auf der Windischen Marck, zu Portenaw unnd auf Salins etc.
Bekennen für uns, unsere Erben unnd Nachkhomen, Könige in Behaim, unnd thun kundt
allermänniglich, demnach wir auf unser gnedigistes begeren, die Ersamen, N. Bürgermeister unnd Rathmannen unser Stadt Brix, sich an unser Statt gegen weilandt Ernsten, Hertzogen
zu Braunschweig unnd Lüneburg, für die Summa der zehen Tausendt Thaler, jeden zu Siebentzig Creutzern gerechnet, so wir Ime von wegen der
Ime schuldigen besoldung unnd Diener Jars bestallung auf vorgehende handlung noch auf drey Jar lang von dato diß brieffs anzeraiten, zubezalen bewilliget, in
proprio verschrieben, also das sie die obberürte Summa unnd anfallende Interesse diese zeit hin selbs bezalen unnd erstatten sollen, darumb sie sich
vermögen zugesagt unnd verschrieben, Thun solches auch hiemit in Krafft diß brieffs vor uns unnd unsere Nachkhomen, Könige zu Behaim, das wir
sie die von Brix nach verschinung der dreyer Jare mit ablegung der obgedachten zehen Tausendt Thaler Schuldtsumma entledigen, sonderlich auch in
zwischen die Interesse von halben Jaren zu halben Jaren ordentlichen entrichten unnd aller dings schadlos halten sollen unnd wöllen, Zu urkhundt mit unserm
Kayserlichen anhangenden Insigel besigelt, Geben auf unserm Königlichen Schloß Prag am sechzehenden tag des Monats Octobris, Anno im Sechtzehenhundert
unnd Siebenden, Unserer Reiche, des Römischen im zwey unnd dreissigisten, des Hungarischen im Sechs unnd dreissigisten, unnd des Behaimischen im drey unnd dreissigisten.
Rudolff
Ad mandatum Sac(rae) Cae(sareae) M(ajesta)tis
proprium
Paulus Michna
Kappeller m(anu) p(ropria)