Wir Burgermeister Richter Rath vnnd gantze Gemein der Kaijser(lichen) vnnd Königlichen freyen Perg
Stadt Schlagkenwaldt für Vnns vnnd vnsere Nachkomben offentlich bekhennen vnnd thüen khundt Jedermenniglich, Daß Vnß die Erbar, Ehrentügenthsame Fraw Walpurgis Weyland Herrn Burgermeisters Eha
herrn Thomae B. hinderlassene Wittib, vf vnser an: bitthen, zu vnser vnnd gemeiner Stadt nutz vnnd frommen vmb die landtsgebreüchliche verzinßung guetwillig dargelegt vnnd gelihen hat Siebenhundert
fl(orenos) Meißnisch, Jedes derselben zu dreissig Schgl(ing) oder Sreintzig kr(eutzer) gerechnet, Welche Wir auch alsobaldt zu vnsern händen empfangen vnnd eingenommen haben, Davor derowegen gedachte Fraw Wal
purgis, Ihre Erben vnnd lehenßleüth oder wer vnsers Cessionis benöttigt, diser Summa halben cum renunciatione exceptionis non numeratae pecuniae, doli mali et simulati contractus, hiemit Quittirn, ledig vnnd
loß, Versprechen darneben bey vnseren wahren worten, gueten Trewen vnnd glauben obbemelte Summa der 700 fl(orenos) nicht allein Jehrlich vnnd Jedes hundert mit Sechs, das Jedesmal halbjahrig
zuverzinßen, sondern auch die haubtsumma selbsten, wann vnß dieselbe ein halb Jahr Zuuor auffgekündigt wirdt, neben dem verlagten Zinßen Ihr der Fraw Walpurgis, Ihren Erben vnnd lehenßleüthen
oder getrewen Cessionibus Inhabern diß brieffs, mit danckh vnweigerlich zu bezahlen vnnd in Ihre gewahrsamb vnnd sicherheit ohn verzug vnnd einiges seümsal, Guldten mit gueter genger vnnd
geber Müntz zu erlegen, Alles bey verpfendung vnserer haab vnnd gütter. Darwieder Vnß, vnsere Nachkomben nichts schutzen, schirmen noch fürtragen soll, weder Geist: noch Weltlich ding, Ex
ception, freyheit, Statut, geboth oder Verboth noch ein ander behelff vnnd außflucht, wieß nahmen es sey oder aber durch allersley weg oder list möchte erdacht werden, die Vnß hierinnen
zu gnaden vnnd derowegen landtgewin oder auch Ihren Erben zur schaden khommen möchte, Sondern thuen Vnß derselben allen hiemit in genere, alß wann sie von wort zu wort vnnd in specie außtruckh
lich benambt wehren, am krefftigisten, wie solches Jnn: oder ausser Rechtens geschehen khan, soll oder mag, verzeihen vnnd begeben. Alles getrewlich vnnd sonder gefehrde. Deßes zu Vhr
kundt, wahrhaffter vnnd vnverbrüchlicher haltung, haben wir vnserer vnnd Gemeiner Stadt groß Jnsigel zu endt diß anhangen vnnd ankhnüpffen lassen, benebens zweyer vnsers
Mittels vnter schrieben, Geschehen vnnd geben am Tag St. Mariae Liechtmeß Alten Calenders, war der andere Monathstag Februarij, Anno Christi tausendt
Sechshundert vnnd Ein vnnd zwantzigisten.
Caspar Bärner m(anu) p(ropria)
Adam Neidhardt
m(anu) p(ropria)