Ich Nicolaus Ratschiner von Rat=
schin Vff Pürles Vnndt Beseraw, Bekenne hiemit Vor mich
meine Ehliche haußfrawen, Vnser bayder Erben Vnndt
Erbnehmen gegen männiglichen Vffund Vnnd bekenne,
Alß das mir die auch Edle Vnnd Viel Ehrentugendtreiche
fraw Johanna Nostitzin eine geborne Ratschinerin, meine in
Gottgeliebte freundliche liebe fraw Muhme Vnnd Gevatter,
Zu meiner Vorstehenden Notturfft Vnnd Gelegenheit
Fünffhundert schock meißn. Jedes schock pro 30 kr. Vnnd den
kr. pro 7 d. gerechnet Vorgestrecket Vnnd gelihen, Welche
ich also Vnden benambten dato an gutter geb Vnnd gang=
haffter müntz Zu meinen händen bahr Vber empfangen
Vnndt dieselbe solches empfangts halber hiemit gnugsam
Quittiren thue, Gerede Vnnd Verspreche
demnach Vnnd hierauff bey meinen Wahren Wortten
guthen Edlichen Trewen Vnndt glauben, das ich gedachter
meiner glaubigerin oder Erben oder Wissendtlichen Inhaber
diß brieffs so lange Ichs mit dero guthen Willen Vnnd
Wissen Inhänden haben Werde, Jährlichen mit landes gebreüch=
lichen Interesse Verzinsen, Dieselben nicht Allein iedes mahl
halb Georgi Vnnd halb Gallj Zu ihren händen ohne
Einige mühe ZußWendung, in ihre geWahsamb Vnverzüglich
Vbersenden, Sondern auch hernachers (iedoch Wann es mir ein
halbes Ihar Zuuohr, es sey Gallj oder Georgi, auffgekündiget
Würde) solche nach Verschliessung des halben Ihars, beydes an
hauptsumma Vnnd Verfallenen Zinsen mit basten gelde, an
gutter Vnverschlagener ganghaffter müntz ohne einigen Ver=
Zugh Vnnd schaden danckbarlichen Wiederumb abentrichten
Vnndt bezahlen soll Vnndt Will: