Wir Carl von Gottes genaden Ertzherzog Zue Osterreich Hertzog Zue
Burgundi, Steir, Cärnden, Crain, vnd Wirtlemberg, Administrator deß Hochmaisterthumbs in Preußen, Maister Teutschen ordens in Teütsch: vnd Wällschen
Lannden, G(ra)ue zue Habspurg, Tirol vnnd Görtz, (et)c. Vrkhunnden hiemit vor menigclichen, Demnach bißhero, durch die im Konigreich Böhem vnd denen incorporirten Lannden, entstan
dene Vnruhe vnnd Rebellion, vil dero Röm(ischen): Kay(serlichen): M(ajestä)t: vnns(er)m gnedigisten Herrn, Lannde vnd Vnderthanen, auß ihreme schuldigen gehorsamb, mainaidiger vnntreülicher weise geschritten vnd getretten, vnnd gemelter Höchstgedachter
Rebellion vnnd Vnruhen sich baistöllig vnnd thailhafftig gemachet, vnnd die Graffschafft Glatz, sambt dero angehörigen Vnderthanen vnd Lannden, nit die geringste gewesen, so sich gegen Höchstgedacht Irer Röm(ischen): Kay(serlichen): M(ajestä)t: (et)c.,
hellisch vnnd feindtselig erzaiget, vnnd endtlichen so lanng, biß dieselbe, von mehrhöchstgedachter Röm(ischen): Kay(serlichen): M(ajestä)t: Kriegsvolckh, nach vilen außgestandten grossen vnnd schweren Vncossten, vnnd lannger belägerung, widerumb
armata manu einbekhommen, vnnd Irem gehorsamb gebracht worden: Neben disem auch, durch diser Rebellen Haß vnnd Neid, der Patrum Societatis Iesu daselbst gehabtes Collegium, Kirchen, Gymnasium, vnd Seminarium
dermaßen muethwilliger weise zerstöret, ruiniret, vnd also verwiestet worden, daß nichts mehr als die rudera deroselben vnnd die fundam(enta) Also haben die gemellte Patres bald nach eroberung derselben Statt vnd vestung
(Wieweil vmb dieselbte, von Höchstgedachter Röm(ischen): Kay(serlichen): M(ajestä)t: erregten Vnruhen vilfeltigen außgestandenen gefahren vnd vngelösten diensten vmbkommen vnd cedirt, vnd ad dies vitæ eignenthumblich eingeraumet worden,
bei vnns pro restitutione in integrum gehorsambist angegeben, vnnd dieselbte werckhstellig zumachen demüetigist gebetten; Worauff Wir vnns dann vmb verbesserung der Sachen mehrer weitläufftigkeit willen, mit gemel
ten Patribus der Societet Iesu, zue Glatz, wegen der daselbsten zerstörten, Kirchen, Collegij, Gymnasij vnd Seminarij, welche Sie vnns zue gnedigistem wolgefallen cediret vnd abgetretten, auff annderer erlittenen Schäden halber,
volgennder gestallt vereiniget vnnd verglichen; Erstlichen, demnach wir des alten Collegij grundt, zue vnserer Statt Glatz, vnnd des Schloßes befestigung vmb vngeheuren gnedigist resoluirt vnnd gemainet,
Alßwollen Wir ihnen den Patribus hinngägen vmbere von dem Wirdigen Wolgebornen Vnserm lieben besondern Niclasen Carln von Schönn auff Lobenberg, S(anc)t: Iohannis Hierosolomitani ordens Rittern, Commendatorn zue
Glatz vnnd Reichenbach, erkauffte Commendam in bemelter Statt Glatz, sambt der Kirchen, Heüßern, Schüelen vnnd gründen, vnd was ehne theilen von rechts wegen darzue gehörig, zue erbawung eines andern Collegij, Gymnasij vnnd
Seminarij, vonnöthen sein wirdt, vollkommenlich durch gewisse vnsere deputirte Commissarien, alsbald vberantwurten vnd einraumen lassen; ihnen darneben gnedigist verkhunndende, daß alle dergleichen Priuilegia, Freiheiten, vnd ge
rechtigkeiten, so sy zuuor auff bemeltes zerstörtes Collegij, Kirchen, Schüelen, Seminarij, grund vnd boden gehabt, genossen vnd rüebigclich gebraucht, auff dißes iezige New erbawende Collegium sollen gäntzlich transferirt vnd velligclich, nichts
dauon außgenommen, hinübergesetzt sein. Zum Andern, so haben Wir vnns auch dahin gnedigist erclärt, daß Wir zu dem Newerbawenden Baw, des Collegij, Gymnasij vnd Seminarij, alle vncossten hergeben vnd darzue
verstatten lassen wollen, Sie auch gäntzlich hindan in allem gnedigist zu vbertragen, auch alle nottwenndige materialia, von Kalch, Ziegeln, Stain, sannd, Laim, Holtz, eysen, wie die namen haben mögen darzuegeben, vnd beizuschaffen
an gestannden orthen, befehlende anuerordnung thun lassen wöllen; daß also bemelte Patres, bei disem Baw ein annders nichts thun dörffen, als die Direction desselben, vnnd die sorge, wie Er in ihreme Contento vollführt werde, vber sich zue
nemmen, vnd den von ihner bestan befindent vnd gelegenheit nach fortzutreiben, vnd endtlich zuuollenden. Drittens, Sowollen Wir in ihne Baw, vber vorbeschribene hilff vnnd notturfft, iärlichen an parem geldt,
Sechstausent Schlesische Thaller, ieder vor Zwaiundviertzig Creützer, in Kayserischer gangbarer wehrung verstatten lassen, vnd sollen iärliche Termin sein, von Georgij zu S(anc)t Georgij tag, vnd allwegen an disem tag des künfftigen
Iahrs Summa vngesaumbt erlegt werden, damit die Bawleüth, auch an der Bawmaterialien vnnd vncösten, bezahlt werden: Massen Wir dann derentwegen gemelte Patres Societatis durch absonderliche Decreta, vmb mehr
er Sicherheit willen, an vnsere Ämbter, besonder aber das Holtzambt dergestallt geinmmer vmb wollen angewisen haben; Also vnnd dermaßen, daß solanng die Patres in ihnem Baw bedürfftig, vnd mit disem nottwendigen gemaintem
Bawgelt nit fürsehen seind, sie allain vnd sonst niemandt, mit disen geföllen sollen befördert werden; auch weder vnsere, noch vnserer Cämer, oder anderer Beambten, wie hoch, vnd wer die immer sein, Decreta, disem zugegen, gültig oder
Kräfftig sein noch erkhanndt werden: Sollen auch Decreta anticipatoria von den Beambten der Vormundtschafft Glatz nit angenommen noch zugelassen werden; Künftigen Georgij des Sechszehenhundert dreyvnd
zwaintzigisten Iahrs, soll die Erste liferung der Sechstausent Thaller vellig geschehen, vnd also iärlich immer forth. Zum Vierdten, Souil die New erbawende Bawwerckh anbelangt, wollen wir gleichsfahls die Zue
lassung anordnung thun, damit die notturfft an Bawholtz, in rechten zeit, so bald es müglich gefällt, vnd zue stelle, wie nit weniger das Brennholtz zum Ziegel, vnd Kalchbrennen, verschaffet, ehnen anhalts derer gueter beförderlicher Vor
thun, zu denen Stain: Sannd: vnd Laimgrueben gethan werde, in welchem ende vnd besserer befürderung willen, die Landt robothen in der Graffschafft Glatz sollen angestellt werden, vnd ihne den Patribus dann allweil Fünffzehentau
sent Thaller Kayserischer wehrung außfolgen vnd geben zue lassen befehlende anuerordnung gethan; Zum Fünfften, Damit die Patres in einer gewißheit ihrer entzogenen Iährlich gelangen, So wollen Wir ihnen gnedigist
die Steüren so hie Mießbrot, Oberschwedeldorff, vnd Haida, der Statt Glatz biß dato vnderwürffig, zu gantz aigen geben, obgesetzte gleich durch Straff, oder abtauschung mit andern bessern pawen. Vber diß, Wann die Statt Glatz oder
ihre besitzende, einen weg als den andern wider Sie einzubringen, darnach wir vns dann zuebequemen wissen werden; Weilen auch der gemelten Patrum der allerso alle Vnderthanen von der Landtsteür oder Contribution vnd
Einbringender frey gewesen, vnd wir ihne dasselbe noch dato seind; So wollen wir auch die andern ihre Vnderthanen, iezige vnd künfftige der Landtsteür, Contribution oder Bawgelder befreien, Soll nichts destoweniger gedachten Patribus
verantwortet sein, wo sie ihre Sachen ehne bei einem oder anndern betragen, denselbigen sich fähig zumachen, Vnd nit weniger ihnen von vns, wider die in specie vberwisene vnd notorische inuasores, destructores vnd raptores billiche vnd
starcke assistentz solle gelaistet werden. Für das Sechste, weil die Statt vnd Clöster, dero Patrum wolangebaute güetter, New Zeüg gantz rüebig vnd wol genossen, wie auß ihrer der Statt aignem Register gnugsam erkundt
get worden, So haben wir das gebäwde hiezu, durch vnsere darzu diser Sachen vollmächtige deputirte Commissarios anschlagen vnd Taxiren lassen, vnd in mittlerem kauff befunden, daß es auff New Iahr ansträgt Vier vnd viertzigtausent
Sibenhuendert, Ain vnd Achtzig Thaler in Kayserischer wehrung, Darzue noch das Vewilligte Zinsgelt, Forst: vnd Zinsgetraide, Margetgelt, Zinshüner, Schultzen vnd andere vnfälbare geföll gezogen, bringen auff New Iahr zusamen, Sechs
zehentausent, Zweihuendert vnd zehen Thaler, Thun also beede Summen, Sechtzigtausent, Neunhundert, Ain vnd Neuntzig Thaler, so wir ihnen wie billich, nach vnd nach wollen erstatten lassen; Endtlichen vnnd
Zum beschluß, dieweil die Patres nit allain noch drei Iar lähr außgehn, sonndern auch in das künfftig von Michaëlis wenig geniessen werden; Also zu einer ergezlichkeit vnd dero nottwendigen Vnderhaltung, wollen wir ihnen
die vns zueerkhanndte vnd haimbgefallene Salaria, biß Michaëlis des Sechszehenhundert dreyvndzwaintzigisten Iahrs, mit allen vnd ieden nutzbarkeiten, iezigen vnd Völligen Iahrs velliglich heimbwalten, vnd aigens zuegeniessen, ge
nedigist auß freiem willen ex motu proprio bewilligen. Dessen alles zu warer Vrkhundt, haben wir Vnnser Ingsigl hierfür gedruckht, Vnd Geben in Vnnser Ertzhertzoglichen Residenz Statt Neiß,
den Fünffvndzwaintzigisten Monattstag Iulij am fest deß hailigen Apostels Iacobi, Nach Christi vnsers Erlösers vnd Seeligmachers geburt, In dem Sechszehenhundert, dreyvndzwaintzigistem Iahre.