Ich Wernher von Braienstein veriehe offenlich an disem brieve allen den die disen brief ansehent oder horent lesen Daz ich dem hochgeborn fursten un(d) minem
genedigen herren herren Rudolfe pfalzgraven an dem Ryne un(d) herzogen in Beyern schuldig bin worden un(d) gelten sol mit reht(er) rechenunge die der vorgen(ant)
herzog Rudolf min herre sine lute un(d) min frunde dabi gewesen sint von des Amptes wegen zu Nurnberch Dusent phunt sybenzig phunt un(d) dru phunt
hell(er) Daz selbe vorgeschriben gelt gelobe ich ze gelten un(d) zu geben hie zwuschent un(d) unser frowen tag Liehtmesse die ze schirsten komet an die stete als ez
der vorgen(ant) min herre hin geschaffet un(d) hat haizzen geben als ouch an disem brief hienach geschriben stat Daz ich Wernher der vorgen(ant) zu den hailgen
mit gelerten worten ainen gestabeten eit gesworn han war stete un(d) vesten zu haldenne allez daz daz hie vor un(d) hienach geschriben stat ane alle geverde
daz vorgen(ant) gelt zegeben Von ersten so wirde ich gebende hern Otten dem Zang minem swager hund(er)t phunt un(d) zwainzig phunt hell(er) die der
Cam(m)er(er) ze Amberg uf die vorgen(ant) hund(er)t phunt gelaistet hat Ite(m) dem(m)ach Herman dem Braienstein minem brud(er) hund(er)t phunt hell(er) Ite(m) minem swager
dem Tauschant von Unzenbrunc ahzig phunt hell(er) Ite(m) Hensen dem Eruler fur syn urlobrot ahzig phunt hell(er) Ite(m) fruzen dem gæmelin von
Nurnberch hund(er)t phunt un(d) zwolf phunt hell(er) Ite(m) vierzehen phunt hell(er) da man umbe loste den gærgliun von Baden die zu Nurnberch under
den Juden stant dar umbe burge ist C(on)rad der Kacherbek Ite(m) dem Kacherbeken zwai hund(er)t phunt un(d) drizig phunt hell(er) dar umbe min
herre der herzog hern C(on)rad dem Kemenater phant hat Ite(m) Symon dem Juden von Nurnberch hund(er)t phunt funfzig phunt un(d) siben un(d) zwainzig
phunt hell(er) Ite(m) Herman(n)e dem Mæwgel zu Nurnberch Nunczig phunt hell(er) Ite(m) wolfel(n) dem Schongaw vierzig phunt haller Ite(m) dem
Burgesdorfer drizzig phunt hell(er) Ich Wernher der vorgen(ant) sol ouch nit den kaiser noch kain and(er) herren kain min frunt noch and(er)s nieman an minen
herren wisen noch schaffen gebieten umbe daz vorgen(ant) gelt ane alle geu(er)de Ich Wernher der vorgeschriben veriehe fur mich un(d) alle mine frunde
uf den vorgen(ant) eit den ich gesworn han daz ich noch kain min frunt noch nieman anders von minen wegen den vorgen(ant) minen genedigen herren
sin lute noch sin lute noch sine diene noch sine Amptlute niend(er) sol angrifen noch schaffen geschedigen von d(er) wegen rechenunge un(d) schulde wegen
ane aller slahte geu(er)de Der vorgeschriben rechenunge rede un(d) dinge so sint die erber(n) lute die hienach geschriben sint zu ainer geziugnisse geben
Von ersten her C(on)rad Schenk(e) der von Erpach her Engelhart von dem Hirsperg d(er)z(eit) an dem brieve des vorgen(ant) mines herren des herzogen stat ham(m)an
von Hausen her Dietharch von wildenstain her ecke der rescher un(d) her C(on)rad der kemenat(er) ritt(er) ebhart von Lachan un(d) hern(n) von pfirt der vogt
von Barm(m)stain Un(d) dar umbe zu ainer mer(er)n sicherhait un(d) war(er)n geziugnisse aller der vorgeschriben dinge so han ich Wernher der egen(ant) min aigen
Ingesigel mit der erber(n) lute hern C(on)rades Schenken von Erpach un(d) hern C(on)rat kemenat(er)s die durch minen bette willen un(d) zu ainer ewigen ge
ziugnisse allez dez daz da vorgeschriben ist Ire aigen Ingesigel zu minem Ingesigel hant gehenket an disen brief Der da geben wart do man zalte vo(n)
Cristes geburte Druzchenhund(er)t Iar un(d) darnach in dem funf un(d) vierzigistem Iare an dem nehsten d(er)n(er)stage vor sant Thomas tage des
hailgen zwolf boten