Wir Wladislaus vonn gots gnaden zu Hungernn Behaim Dalmacien Croacien ec(etera) künig, Marggraue zu Merhern Hertzog zu Lucemburg vnnd Inn
Slesienn, Marggraue zu Lausitz ec(etera) Bekennenn vnnd thun kundt allermenniglich, Das vns der gestrenng Caspar von Pöbritz Ritter auff Fridt
lanndt, vnser lieber getrewer, bericht, wie sein vater Nclas von Pöbritz viertzig schogk Behemischer grosschenn Järlicher tzinß auff der stadt Buben
kauffweiß vmb sechs hundert Römische guldenn von dene von Polentz sambt den verschreibungen daruber an sich bracht, die etwann von kaysere
Sigmunden löblicher gedechtnus auch den Vögtenn in Niderlausitz vnd anndernn Innhalts irer brieue, des vns genanter von Pöbritz alle furgetragen
vnd getzaigt Erstlich vmb vier hundert schogk behemischer grosschenn abzulösenn versatzt vnd verschribenn wernn, Vnd darauff mit diemutigem
vleis gebettenn, Das wir die ablösung bey solcher angetzaigter summa yn den aldenn brieuenn gnediglich bleibenn vnd lassenn woldenn, Haben
wir ansehend getrewe angeneme dienste, so vns der gemelt Caspar von Pöbritz vngespart leibs vnd guets offt vleissig gethan, hinfur dester
lieber thun soll vnd mag Vnd darumb hiermit vnd yn krafft ditz brieues auß Behemischer küniglicher macht als Marggraue zu Lausitz reichte
wiß dem Jene von Pöbritz gnediglich begabt vnd zugelassenn, Wann wir vnser erbenn vnd nachkomende künige zu Behem vnd Marggrauenn
zu Lausitz solichenn tzinß viertzig schogk behemischer grosschenn auf vnser stadt Buben von Jme seinen erbenn vnd nachkomen wider kauffen vnd
ablösenn woldenn, Das solichs nicht anders dann mit vier hundert schogk behemischer grosschenn Innhalts der altenn brieue vnd verschreibunge, des
wir hiermit Inmassenn dieselbenn von worte zu worte Inserirt, Confirmierenn vnd bestettigenn, soll bescheen, Wir thun auch genantem von Pöbritz
diß besonndere gnade, Das Jorgen von Pöbritz seinem sone die obgeschribnen viertzig schogk behemischer grosschenn zu seinen lebtagenn von vns vn
sernn Erbenn nachkomenden künigen, Marggrauen zu Lausitz vnd menniglich vnabgelöst sollen bleibenn, Wo dann nach Jrer baider abgange
wir vnser erbenn vnd nachkomende iren Erben vnd nachkomen vierhundert schogk behemische grosschenn oder Tausent Römische guldenn zur
ablösung obberürter viertzig schogk betzalenn vnd niderlegenn, Alsdann vnd nicht eher sollenn die vorpflichtig vnd schuldig sein, die obgeschribene
Jarrrentte wider abzutrettenn vnnd gehorsamenn vngeruerlich Bleibenn darauff allenn vnserm Vögtenn ambtleutenn vnd verwesernn in Nider
lausitz ytztigenn vnd zukunfftigenn die genantenn von Pöbritz ir erben, oder wems sy solichenn tzinß mit vnserm zulassenn verkauffenn, bey diser
vnser verschreibunge vngehindert zulassenn, darbey zuschutzenn vnnd handhabenn bey vermeidung vnser straffe vnd vngnade, Zuo vrkundt
mit vnsermm küniglichenn anhangendenn Infsigel besigelt Gebenn zu Prag Sonnabents vor dem Palm Sontage Nach cristi geburt fünff
tzehenhundert vnnd im Neunndenn Vnnser Reiche des Hungerischenn Jm Neunntzehendenn vnd des Behemischenn Jm Acht vnd dreissigsten
Jarenn; Ad relacionem Magnifici d(omi)ni Alberti de Kolowrat et libstein, Supremi Cancellarij Regni Bohemie ec(etera)