Wir ferdinand von gottes genaden zu Hungern vnd Behaim(en) (etc.) künig, Jnfant in Hispanien,
Ertzhertzog zu Osterreich, Marggraue zu Merhern, Hertzog zu Lützemburg vnd in Slesien
Marggraue zu Laußitz (etc.) Bekennen für vnns vnns(er) Erben vnd Nachkumen künig
zu Behaim offenlich mit dem brief, Als vnns(er) Burger auf der klain seitten zu Prag,
vnd getrewer maister paul Lebenperger Goldschmid, Von wegen ainer Jering vnd vnder
halten schuld, So etwan wolfgang steyfer weyland vnnsers lieben Brueder vnd Swager künig
Ludweigen löblicher gedechtnus Organist, bey Jme getan, vnd darumben ain Jnstrument
Regal genennet versetzt, vnd darob(en) ain schuldzedel gegeben habe, Welhes Jnstrument
aber durch berürt(en) künig Ludweigen, wegen bezallung sölher des Organisten Jering
zu seiner lieb hannden von Jme zuerledigen, dem Hochgebornen vnnserm Ohaim
Fürsten vnd lieben getrewen Carls Hertzogen zu Münsterberg vnd zür Oels, beuelhen word(en),
das Er alß auf gut vertröstung Hertzogen Carls hinauß gegeben, aber angezogne Jer
ing (wie des(s)wegen mergemelter hertzog Carl durch sein schreiben an vnns(er) verordente
Camer in Behaim getan, kuntschafft gibt) noch außstenndig sey, Derhalben zu vnns
anfordrung vnd zuespruch gesuecht, das wir vnns nach erfarenheit vnd erkundigung
der sachen, vmb sölh sein anfordrung, angezaigter Jering halben, von bestimbt(en) vnnserm
verferder Herrnerendt, gütlich vertragen, veraint vnd vergleicht haben, Alß vnd
der gestalt, das wir demselben Maister Paul Lebenperger oder seinen Erben, oder
getrewen briefs Jnhabern, Vmb vnd für obgemelte sein außstenndige schuld vnd an
fordrung, raichen vnd bezallen söllen, Zwaintzig schockh groschen Behaimisch, Nemblich
halben tail das ist zehen schockh groschen Behaimisch auf sand Gallentag, vnd den ann
dern halben tail, auch zehen schockh groschen, auf sand Georgen tag, nachstkunfftigen,
mit sölher Suma merbestimbter maister paul, vnd all sein Erben, vmb die berürt sein schuld
vnd anfordrung benügig sein, Vnd kainerlay vordrung zu vnns noch vnns(er)n Erben, der
halben weyter haben noch suechen sölle, Vngeuerlich, Vrkund dits briefs, Geben auf
vnnserm kün(iglichen) sloß zu Prag den viertzehent(en) tag Monats may, Nach Cristi geburde funf
zehenhundert vnd Neunvndzwaintzigist(en), Vnns(er)er Reiche im dritten Jaren,
Ad mandatu(m)
Regie m(aiesta)t(i)s
Albrecht von guttenstain
et glatz (etc.)
Zdenka z l(e)w(a)
(etc.)