Ich Hainreich von Leuchtenburch h(er)r zv Tetow vnd mein liebe havsfraw vraw Agnes vnd alle vns(er) erbn dichen vnd tvon chunt Allen den di
disen p(ri)ef sehent od(er) horent lesen di nv lebent vnd h(er)nach chvnftig w(er)den daz wier mit gvott(er) willen vnd mit wolv(er)dachtem muot vnd zv d(er) czeit
do wir is wol getvo(n) mochten durch got vnd durch aller vns(er) vord(er)n sel selicheit willen vnd durch vns selb vnd aller vns(er) nachchvmling sel selichait
willen vnd durch ablas vns(er) svnden vnd durch aller gvott(er) werch di do geschehn sein vnd noch alle tag in gotes lobe geschehnt daz wir d(er) tailhaftig
mvge(n) w(er)den vnd zv eim ewigen selgeret gebn vnd gegebn habn Acht fuod(er) holz in vns(er)m wald d(er) da czwischen pulicz vnd tewtschowiz stet zv dem
chloster zv znotm daz vns(er) vrow(e)n den barfus(er)n p(ruo)d(er)n daselbst p(ruo)der frenzel dem g(ar)dian vnd dem ganczen Conuent d(er) p(ruo)d(er)n sand
francisc(us) orden di nv sint vnd hernach chvnftig w(er)den also daz di egenanten p(ruo)d(er) di e genante(n) acht fuod(er) holz in dem egenanten wald alle
Jar ewichleich ie daz fuoder als is vier pfert gecziehen mvgen schullen nemen vnd in ir chloster fv(e)ren vnd damit ir ndurft schaffen also
beschaidenleich daz se alle Jar ewichleich ein tag in dem Jar vns(er)n vord(er)n ieren Jar tag schullen begen mit vigilj vnd mit selmessn mit an
geczvnt(er) cherczen als gewonleich ist in d(er) heilign ch(ri)stenhait vnd wenne got hie auf erdreich vns(er)s lebns nicht leng(er) habn wil daz se
auch vns(er)n Jartag vnd peygräbt vnd aller vns(er) nachchvmlingen wenne got vb(er) se gepeutet alle Jar ewichleich schullen begen als vor geseczt
ist vnd schullen auch vns(er)n vord(er)n vnd vns selbs seln wenne got vb(er) vns gepeutet zv allen heilign czeiten an iern p(re)dign gedenke(n)
als gewonleich ist in d(er) heiligen ch(ri)stenhait vnd habn di e genante(n) acht fuod(er) holz in dem e genanten wald zv dem e genanten chlo
ster gegebn ab wier od(er) vns(er) nachchvmling den e genante(n) wald v(er)chouften daz wier nicht v(er)chouffen mvge(n) noch schulln di e genante(n) acht fuod(er)
holz di se alle Jar ewichleich nemen schullen vnd in ir chloster fv(e)ren vnd d(er)uon alle w(id)ersp(re)chen stet vnd wandelung ewichleich zv tvo(n) als bescha
den stet vnd zv ein(er) ewigen vrchvnd vnd stetichait aller dis(er) sach vnd wandelung gib ich e genant(er) Hainr(ich) von Leuchtenburch vnd mein liebe
e genante havsfraw vraw Agnes disen gegebn vrchvnd p(ri)ef zv dem e genante(n) chloster dem Conuent d(er) arm(en) p(ruo)d(er) v(er)sigelt mit vns(er)n anha
ngunden Insigeln vnd habn gepeten mein liebn p(ruo)d(er) h(er)r(n) hansn vnd h(er)r(n) Jorgn von Leuchtenburch h(er)r(e)n zv tetow vnd di erbn h(er)r(e)n
h(er)r(n) czesem von tewtschowiz vnd h(er)r(n) philip von Jäwlow di alle ir Insigel zv geczeugnuss dis(er) w(id)ersp(re)chen sache habn gehangen an disen
gegenbv(e)rtigen p(ri)ef d(er) gegebn ist do man czalt von ch(ri)stes gepv(e)rd drewczehen hvnd(er)t Jar darnach in dem Acht vnd sech
czigstem Jar an sand gallen tag