Wir Sigmund von gotes gnaden Romischer kunig zu allen zeiten Merer des Reichs vnd zu Vngern zu Behem Dalmacien Croacien(etc)
kunig Bekennen vnd tun kunt offenbar mit disem brief allen den die jn sehen oder horen lesen Das fur vns komen ist der Ersame Wenczlaw holub ettwan
Spitalmeister zu Eger vnser lieber andechtiger vnd hat vns furbracht gute kuntschaft wie das er von den Brudern des Ordens mit dem Stern redlich vnd
nach solicher gewonheit als von alters herkomen ist nach tode des Ersamen Jan Crapsti sinen vorfaren zu meister vnd verweiser desselben Ordens eintre-
tratlich erkoren vnd erwelet sey Vnd hat vns als einen kunig zu Behem sinen heren vnd des vorgen(anten) Ordens Obristen schuczer vnd schirmer demutiglich gebeten
das wir zu solicher kure vnd welung vnsern kuniglichen willen vnd verhengnuss zugeben vnd dem vorgenan(ten) Orden alle vnd ygliche jre Recht freiheit brief
priuilegia gnad gesecze gute gewonheit vnd guter wo sy die in vnserm land zu Behem in merhern in dem Egerland oder anderswo vnder vnsern vnd der Cron
zu Behem gebieten haben die jn vnd demselben Orden von rechts wegn vnd von alters her zugehoret haben vnd noch zugehoren zu bestetigen zu confirmiren
vnd zubefestnen gnediglich geruchten Des haben wir angesehen des egen(anten) Wenczlaw holubs vnd siner Bruder diemutige vnd flissige bette vnd auch son-
derlich sunderliche trewe vnd gehorsamkeit die die vorgen(anten) Bruder vnd der gancz Orden zu vnsern vorfaren seligen vnd auch der Cron zu Behem allzeit vn-
uerdrossenlich getragen vnd bewiset haben Vnd nemlich das der vorgen(ante) Orden zu vnd vff enthaltung Armer vnd siecher lute vffgeseczt vnd gestifft ist
Vnd haben dorumb dem Almechtigen Got zu lob vnd meren vnd dem vorgen(anten) Orden zubefestung zu gut vnd zu besunderm aufnemen vnd becreftigung mit
wolbedachtem mute gutem rat vnd rechtem wissen vnsern kuniglichen willen gunst vnd verhengnuss zu solicher kure vnd welung des vorgen(anten) holubs gnedig-
lich gegeben jn fur einen meister vfgenomen vnd jm vnd den vorgen(anten) brudern vnd dem ganczen Orden alle vnd ygliche jre recht freiheit briefe priuilegia gnad
gesecz gute gewonheit vnd guter wie man die mit sunderlichen worten benennen mag vnd wo sie die in vnserm land zu Behem zu merhern in dem Egerland
oder anderswo vnder vnsern vnd der Cron zu Behem gebieten haben die jn vnd demselben Orden von rechts wegen vnd von altersher zugehoret haben vnd
noch zugehoren bestetigt confirmirt vnd befestnet bestetigen confirmiren vnd befestnen jn die ouch von kuniglicher maht in crafft diss briefs vnd meinen
seczen vnd wollen das der vorgen(ante) Wenczlaw meister vnd sine Bruder vnd der gancz Orden solicher gnaden Recht brief vnd guter gebrauchen vnd geniessen
sollen in glicher wise als das bey vnsern vorfaren seligen kunige zu Behem zeiten herkomen vnd gehalden worden ist von allermenniglich vngehindert
Vnd wir gebieten dorumb allen vnd yglichen fursten geystlichen vnd werntlichen Grauen freyen heren Rittern knechten Steten vnd gemeinden vnd sust
allen andern vnsern vnd des heiligen richs vnd der Cron zu Behem vndertanen vnd getrawen in welichem Adel wirden oder wesen die sein ernstlich
vnd vestiglich mit disem brief das sy die vorgen(anten) jren Bruder vnd den ganczn Orden an jren gnaden freiheiten vnd gutern niht hindern noch jrren in
keinweis Sunder sy der gerulich gebrauchen vnd geniessen lassen Als lieb jn sey vnser swere vngnad zuuermeiden vnd bey verliesung solicher pe-
ne vnd pusse in vnser vorfaren brieuen begriffen Vnd sunderlich dreissig mark lotigs golds die ein yglicher der darwider tut als offt das geschiht ver-
falln sein sol halb in vnser kuniglich Camer vnd halb dem vorgen(anten) meister vnd dem ganczen Orden vnleslich zubeczalen Mit vrkund diss briefs ver-
sigelt mit vnserm kuniglichen anhangendem jnsigel dann wir vnser maiestat jnsigel zu disem mal niht bey vns hetten das doch allhie solich craft
Vnd maht haben sol glicher wise als ob vnser maiestat jnsigel doran hienge Geben zu der lippa in Vngern Nach crists geburt vierczehenhundert vnd
dornach in dem Sechs vnd zwenczigisten jaren an sant lucien tag vnser riche des vngrischen ac in dem vierczigisten des Romischen in dem Sibencze-
henden vnd des Behemischen in dem Sibenden jaren
Ad mandatum domini Regis
Caspar Slik