In gotis namen amen Wir hannos von bebirſteyn vnd wir hann(us) der eldiſte von bebirſteyn alz dy ſelbiſchul
degyn vnd wir hann(us) ſwering von bebirſteyn alz eyn burge mit vnſin erben bekinne offinbarlich mit
deſim briue vor alle den dy yn ſehen adir horen leſen daz wir mit gutim bedechtniſſe vnd mit
rote vnſir vrunde habin vorkauft recht vnd redelich yn eyme rechtin kaufe vf vnſirm dorfe daz
da heiſit der Stolcz in dem frankinſteyniſchen gebite den erbern lutin hern Enecht von hugelwicz co
metur zu dem thunc vnd hern Niclos Cometure zu Richinbach brudir ſente Johans ordins vnd
auch dem ſelbin ordin vuczen marg Jerlichis zinſis p(ra)ger groſſchin polemiſchir zal vm ſechczen marg
vnd vm hundirt marg p(ra)ger groſſchin polemiſchir zal dy ſie vns vorgulden vnd bezalt habin den
ſelbin zins vuczen marg globe wir mit geſamptir hant vngeſundirt vuczen tage zu hant noch ſente
michils tage alle iar den vorgeſprochin hern Enecht von hugelwicz vnd hern Niclos Cometur zu richin
bach vnd dem ordin zu gebin zu bezalin vnd zu leyſtin yn der ſtat zu Richinbach mit vnſin botyn
mit vnſin ſchadin vnd mit vnſir zerunge vnvorzogin in gutin ewen an alle argeliſt vnd an alle
wedir rede zu habin vnd zu beſiczin den vorgenantin zins vuczen marg vf deme vnd yn dem vorge
nantin dorfe zu dem Stolcz gemachſam vnd fredelich vnd vngehindirt von vns vnd von vnſin erbin vnd
von vnſin elichin nochcomelingin vnd von allin vnſin vnderſeſſin nv vnd eweclichin Wer is abir ab
wir den vorgenantin hern Enecht von hugelwicz vnd hern Niclos Cometure zu Richinbach vnd dem
ordin vf den vorgenantin tag den zins vuczen marg zu Richinbach nicht bezaltin als vor hy geſcribin
ſtat zo globe wir mit geſamptir hant vngeſundirt in gutin ewen vnd an argeliſt vnd wed(ir)rede in
yn dy ſtat zu Richinbach zu ritin vnd in der ſelbin ſtat yn eynir gemeyne herbergin eyn recht y(n)
legir zu halden vnd nymm(ir) vs der ſtat zu kumin is ſy d(en)ne daz wir den obgenantin hern Enecht von
hugelwicz vnd hern Niclos cometure zu Richinbach vnd dem ordin den vorgenantin Jerlichin zins vuczen
marg gancz vnd gar bezalin Auch wer is ab wir hann(us) der eldiſte von bebirſteyn vnd wir hann(us) von
bebirſteyn dy ſelbiſchuldigin von gotis fugin vnd von des todis wegin abe gingin ſo globe wir hannos
ſwering von bebirſteyn mit vnſin erben den vorgeſprochin zins vuczen marg den vorbenantin hern Enecht
von hugelwicz vnd hern Niclos vnd dem ordin vf den ſelbin tag in der vorgenantin ſtat zu Richinbach
in gutin ewen an argeliſt gliſchir wis zu bezalin in allin gelobdin vnd vnderſcheit als vor hy geſcribin
ſtat Auch wer is ab vns herre der keiſir adir ſyne anelwalden dy vor geſprochin hern Enecht vo(n) hugelwicz
vnd hern Niclos vnd den ordin hindirtin daz is yn der obgenante(n) zins vuczen marg nicht gv(n)de
zo globe wir mit geſamptir hant vngeſundirt ſy daz yn thwin in gutin ewen an alle argeliſt vnde
wed(ir)rede vnd ſuln eyn zins alzo lange hebin bis daz wir ſy hundirt marg vnd ſechczen marg in der
ſtat zu Richinbach gancz vnd gar bezalin doch in ſulchir vnderſcheit wer is ab wir alz ſchathaftik wurdin
daz wir den vorgenantin zins vuczen marg weldin wed(ir) koufin von den obgenantin hern Enecht vo(n) hugelwicz
vnd von hern Niclos vnd von dem ordin noch ſente michils tag wel zit daz were in dem Jare wen wir
denne dy obgenantin hern Enecht von hugelwicz vnd hern Niclos vnd dem ordin bezaltin hund(ir)t marg
vnd ſechczen marg zu mole mit enandir in der ſtat zu Richinbach zo ſullin dy vuczen marg zins
wed(ir) an vns geuallin Mit orkunde dys briues den wir habin vorungeſigilt laſen mit vnſin angehangin
ingeſigilin Gegebin vnd geſchin zu dem Stolcz an deme nehiſtin ſuntage noch pfingſtin Noch
gotis geburt towsent iare vnd dry hundirt iare vnd in dem dry vnd ſechczigſtin iare kegenwir
ticlichin den erbin lutin hern Cunrad pfarrer zu dem Stolcz pezolt vo(n) tarnaw Nige ſchaltheis von
der harte hern Johanes p(ri)o(r)e in dem ſpital zu Richinbach vnd meiſtir Cunrad ſtat ſcriber zu
Richinbach mit andirn bedirbin lutin vil