In gotis namen amen. Wir Potho von Czastolowicz von kuniglicher gewalt der cronen zu Behem hawptman zu franckinstein
Wir bekennen offinlichin in dezem brif allen den dy in an seen adir horin lesin daz in uns kegenwortikeit komen ist der Erbir
knecht Hannos Budilo mit gesuntem libe mit wolbedachtem sinne und mit gutem rote seyner frunde und unbetwongin und
hat bekant daz her vorkouft hat racht und Redelichin dem Erbirn knechte Niclos von Czenebus eme und allen seynen elichin
geerbin und nachkomelingen Czen marg geldis Jerlichir gulde uf drin hubin und uf czwen Ruten in dem dorffe zu Tarnow daz
da lit in dem weichbilde zu franckinstein mit allem nucze mit allir hirschafft miche und zu nemin alz ze Hannos Budilo an erstir
bis hint von seym vatir und gehabit und besessin hat. Und dy zilbin hubin und Ruten habin dy gebawer dy hir noch geschribin steen
michel Czirns Sechs Ruten nucze asanker fumf Ruten stanc in dem dorfe vir Ruten Pecz nrener dri Ruten Pecz Jeske gas
Ruten lodewigin czwo Ruten Hannos swancke vir Ruten nucze heynusch vir Ruten uf den zelbin gebawern hat her vorkouft
fundirlichen eynige und alle hirschafft dy der eyn Hannos Budilo uf in hat gehabit und dy vor gesprochin Czen marg geldis uf den
vorbenum(ten) drihubin und uf czwen Ruten hat her vor uns willichlichin uf gelozin dez habe wir an geseen In rachtin lehen und
beche und habin daz genumen in uns hende von kuniglicher gewalt der wir gebruchin in dem weichbilde zu franckinstein und
habin dy eyn Czen marg geldis Jerlichir gulde uf den vorbenan(ten) drihubin und uf czwen Ruten zu Tarnow gericht und
gelegin dem ob genan(ten) niclos von Czenebus eme und allen seynen elichin geerbin und nachkomelingen zu eyme Rechten
lehe erplich zu besiczen und unsir hirn dez kunigis zu Behem und der cronen unschedelichin ewen Rechte und dez zu
eyme geczeugnisse habe wir dezen brif lozen vorsigeln mit kuniglichem Ingesigel daz da gehorit zu lehin und zu rachtin in dem
weichbilde zu franckinstein dez sint geczeug dy Erbirn und dy Erbirn her cunrad von der Creybnicz her friderich von Cunczin
dorf Rittir Arnold von petirswalde hoffemeistir zu franckinstein Renczko schof niclos nuczl Augustin von dem Bawmgart
en und andir vil bedirber lewte und Arnold von petirswalde unsir schriber den wir dize sache befolin habin. gegebin
zu franckinstein an dem nestin monntage noch sancti martini am sint cristus geburt Tausunt drihundirt Jar in dem
virten und sibinczigisten Jare