Ich . Otte von Ewerat . vnt ovch min hovsvrowe fro Margret . vnt min svn Hainrich . wir vergehen offenlich an disem brieve vnt tven
chvnt allen den die disen brief lesent oder hoerent lesen . die nv lebent vn her nach chvnftich sint . daz wier mit gvotem willen vnt mit
verdahtem mvet . vnt ovch mit gvnst vnt mit rat aller vnser vrevnde vnt vnser ritter . dem heiligen lande ienhalp meres . vnt
ovch den brvdern von Sant Johannes datze Mewerperge . ze chovffen haben gegeben vnseres rehten aigens datze Havgestorf
sehsihalp phvnt phenninch geltes . daz wier getvechlichen in rehter gewer ienneher braht haben von vnsern vordern . vm
finf vnt fvnfzich phvnt wienner phenninge . vnt habent vns der gewert reht vnt redelich daz wier si nihtes enzeihen . si
soln ovch mit dem vorgenantem aigen vnt mit dem gelte freilich schaffen allen iren willen vnt allen iren frvm an allen irrsal .
also daz wier fverbas noch dehain vnser frevnde nimmermer dehain reht noch dehain ansprach dar ovf haben svln . vnt werden
ovch fver daz vorgenant aigen rehte scherm als landes reht ist vnt aigens reht fver alle ansprach . Daz disev rede vnt
diser chovf also stat sei vnt immer vestichait habe . noch von niemen her nach verwandelt noch ver irret werde . dar vber gebe wir
den vorgenanten brvdern disen brief ze einer staten warnvnge vnt ze einem sihtigen vrchvnde diser sache . versigelt mit minsel
bes Otten insigel . vnt mit mines svnes insigel Hainriches des vorgenanten . vn mit disen ersamen gezevgen die her nach ge
schriben sint . daz ist her Thven min brvder . her Levtolt von Chvnringe . her Hadmar von Svnneberch . her Stephan von
Meyssowe marschalch von Osterich . her Chvnrat von Pilhtorf . her Herman von Wolfgerstorf . her Levpolt von Sah
sengange . her Chvnrat von Pvechperch . her Vlrich von Wolfgerstorf . her Karl von Gvtsowe . her Otte von Mverte
steten . her Hainrich Syphersovs . vnt ander biderbe levte genvege . Diser brief ist gegeben datze Wienne . des iares do vn
Christes gebvert ist gewesen . T ovsent iar . zwai hvndert iar . vnt in dem ain vnt Nvnczigistem iar . an sant Mich
heles tach . ;