Wir vlrich vnd Dietreich von pvechperch paid prveder von wazzerlevch ver
iehen vnd tven chvnt allen den die nv lebent oder nach vns chvnftich sint die
disen prief sehent lesent oder lesen hörent. Daz wir paid mit vnseim gvetlichen
willen. eins lehens aigenschaft daz da leit datz dem dypolt daz vlreich von dem
Swikers von vns zerechtem lehen hat gehabt dvrch vnser heil vnd vnser
selde. vnd dvrch vnser vordern sele willen auf sant Johannes alter datz
Nevnperg. ledichlich haben gegeben mit so getaner beschaidenheit
daz der selb vlreich daz vor genant lehen von sand Johans vnd von
den hailigen die datz Nevnperg rastent zerechtem pvrchrecht haben
schol. vnd da von dienen zwelif phennig gewonlicher mvnz an sand
Jörgen tach. Daz dise red stet vnd vnzeprochen beleib. vnd der vor
genant vlreich vnd alle sein erben von vns paiden vnd von allen
den die vns an windent vnbeswart vnd an alle ansprach. dar vmb
geb wir im disen prief der versigelt ist mit vnser paider
insigel. Diser red sint auch geziwg her vlreich von pvechperch
der viztvm. vnd her chvnrat von pvechperch. sein prwder her wul
finch her alber von pvechperch. her chvndaker von Reteinperg
her alber von chuchperch vnd Otte sein prveder. vnd weichart
von pernaw. Rvedolf sein svn. Rvger von pernaw. Otte graf
chvnrat von Gvmping vlreich sein prveder. Gotfrid von har
raz Rvger sein prveder. vnd ander piderb levt den die red
chvnt ist. Diser prief ist gegeben da von christes gepverd
warn ergangen Tausent iar drev hvndert iar in dem
sechsten iar an sand Gregory tach.