Ich Chunrat der Gibenhos ze den zeiten ze Nuenburch chlosterhalb und wir der rat gemain von der selben stat
tu(e)n offenleich an disem brief allen den di in lesent oder ho(e)rent lesen di nu leuent un(d) her nach chunftig sint
Daz der erber herre pru(e)der Johannes von Rosenstain ze den zeiten maister ze Mra(e)wergs un(d) den erber sompnug
dez selben goteshause pegnadet hawent unsn purger Leubmann an seinem sun hern Ru(e)gern den seu innerchleich durch
got und durch sand Johannes lieb in den orden un(d) in ir pru(e)derschaft enpfangen hawent Hawent auch sich
Leubman un(d) sein hausfrawe u(e)re u(e)zeschilt und ir paider erben mit iren tu(e)n dez sepunden mit gu(e)tlichem
willen dem orden dez goteshause ze Mra(e)wgs daz der selb her Ru(e)ger Leubmans sun nach der vorgnanten seins
vater un(d) sein mu(e)ter tod etleichen erbteil mit seinen geswisterciden hawen sol an allem dem gu(e)t daz seu lazzent
ez sei purchreht oder zehent swie so daz genant ist sol auch der selb hern Ru(e)gers erbteil furbaz dez gotes
hause ze Mra(e)wgs ledichleich sein ze allem dem reht und den andern geswisted iren erbteil hawent ob her
Ru(e)g(er) seinn vater Leubmann un(d) sein mu(e)ter u(e)ren u(e)zeschilten uber lebt Ist auer daz h(er)n Ru(e)gern sein
vater un(d) sein mu(e)ter uber leuent so sol der selb h(er)n Ru(e)gers erbteil hin wider an seinen geswistered geualln
Daz deu vorgedaht wandlung furbaz an allen chrieg staet un(d) unzbrochen beleib dez geben wir der
erbern sompnung dez Goteshause ze Mra(e)werperig disen brief ze ewigem urchunde un(d) ze einem
warn zeug diser sache versigelten mit unserr stat insigel Der brief ist gegebe(n) ze
Nuenburch chlosterhalb do von Christes geburt ergangen warn Dreutzchen hundert iar dar nach in
dem Neuntzehentem jar an dem palm tag