Ich Eymprecht von Ymmendorf vnd ich Elzebeht sein Hausvrowe vnd ich Hainreich sein Svn von Ymmendorf vnd
alle vnser Erben Tvn chvnt allen den die disen Brief sehen oder horen Lesen Daz wir mit vordachtem mvt mit
gesampt hant mit vnser Erben gvtlichem willen vnd mit vnser pesten frvnde rat zv den zeiten da wir ez wol
getvn mochten haben geben zv chaufen vnse Echten aigen drey schillinge metzen Wiertz gvter mvtze Vnd ein sechtze
vier phvnt phenning geltes vnd zwen phennig geltes Wien(er) mvtz Die da ligent zem Dirpach auf an dem wald
vier Lehen vnd auf an dem wald drey hofsteten vnd alles daz dar zv gehort zv velde vnd zv dorf gesvcht vnd vngesvcht
mit alle dem Reht vnd wir ez gehabet haben den Erben hren vnd dem Havs zv Menvart Sand Johans orden vmb sehtz
phvnt vnd vmb hvndert phvnt phennig Wien(er) mvtz Der wir gancz vnd gar verricht sein vnd geret vnd lvtte
den vorgenanten hren vnd dem havs zv menvart wir vnd all vns(er) Erben vmb die selb gvlt rehten schirm vor all ansp(r)a
ch nach des landes Reht zv Osterreich Vnd ob die selben hren des geltes dhain ansp(r)ach gewvnne(n) swel
hen schaden si des nemen den schvll wir vnd all vns(er) Erben in ablegen nach des landes reht zv Osterreich Vnd tet wir des niht
so schvlln sie daz haben auf vns vnd auf all vnser Erben vnd auf all vnser gvt vnd vns(er) erben gvt daz wir haben in dem
Lande zv Osterreich Vnd daz in die Red stete vnd vnzvbrochen Bleib dar vmb geb wir in disen Brief V(er)sigelt mit vns(er)s
hren Ansigel h(er)n Albern von chvnringen vnd mit meim ansigel vnd meins svns Ansigel h(er)n Hainreichs von ymmendorf
Dez ist gezevg Dytemar d(er) Holczman Rvd(olf) von Gvnterstorf so poezmanstorf Gotfrit von hawas Wolfel vo(n) haw
was Gotschalch von hawas chvnrat d(er) Gvmping(er) vnd and(er) erber levte genvc Der Brief ist geben (n)ach christi ge
pvrt Dreyzehenhvndert Iar dar nach in dem dreyzigsten Iare an sand Lavrenczen tag des marterers