Ich Aydas von Eideprun vnd ich Elzabeth sein hausvrowe Wir tuchen chunt allen den die disen brief lesent oder
hoerent lesen die nu lebent vnd noch chunftig seint Daz wir mit gesamter hant mit bedachtem mut vnd mit vns(er)s erben guetlichem
willen vnd mit vnser pesten freunde rat vnd meiner hausvrowe bruder guetlichem willen Gebhart dez geucler vnd seines bruder
Johans vnd mit and(er)s erben guetlichem willen In den zeiten da wir ez wol getun mochten Haben gegeben ze chaufen den erben h(er)ren
ze wienperch sand Johans orden vnse rechten aigen Sechs vnd Sibentzig pfenning guetes Wiener munez die da ligent da ze
Puch auf ainer hofestat vnd allez daz dar zu gehoert ze veld vnd ze dorf Isucht vnd vnsucht mit alle dem recht vnd wir ez
gehabt han da ze den zeiten auf gesezzen was pertholt der eberstorfer Die wir gegeben haben vmb achtehalb pfund Wien
ner pfenning der wir ledelich vnd recht bricht sein vnd gewert vnd durch vnser sele hail wille Vnd haben auch
den vorgenanten h(er)ren ze wienperch vmb die selbe guete rechten schirm fur all ansprach nach des landes reht ze oesterreich Vnd ob
die selben h(er)ren des guetes chain chrieg od(er) chain ansprach gewunne od(er) chain schaden nemen von schuld wir in ablegen nach des landes reht
ze oesterreich Vnd tet wir des nicht so schullen sie daz haben auf all vnser guet vnd vns(er)s erben guet daz wir haben in dem
lande ze oesterreich Vnd daz in die sache stet vnd vnzeprachen bleibe dar vber gib wir in disen brief Ingesigelt mit meim Insi
gel vnd meins gesweher Insigel Gebhart des geucler vnd seins brud(er) Johans dez geucler Dirre sache ist gezeugh Wolfing
mein vater der Eideprunner vnd Johans mein bruder vnd haug der guffing vnd vlreich der peusenprunn(er) vnd haug der
Zetel vnd andir erber leute gnueg Der brief ist geben nach christi gepurt dreizehenhundert Iar dar nach in dem drei
zigesten iare an sand philipps vnd sand Jacobs tage der hailigen zwelfpoten