Ich Leymprecht von Ymmendorf vnd ich Elzbet sein Hausvrowe vnd ich Hainreich sein Svn von Ymmendorf
vnd alle vnser Erben Wir tvn chunt allen den die disen Prief sehent oder horent Lesen Daz wir mit vordachten
mut mit gesamter hant vnd mit vnser Erben gvtlichem willen vnd mit vnser pesten Frivnde rat zv den zeiten
da wir ez wol getvn mochten Haben gegeben zv chaufen den Erber Herren vnd dem Haus zv Heiliperch Gevd so
haist Otten vnsern Hoff zem Oydole vnd alles daz dar zv gehort zv velde vnd zv dorf vngesvcht
versvcht vnd vnversvcht mit alle dem Recht vnd wie wi gehabt haben von rechtem Pvrchrecht zv vier vnde
zwanzig phennig von vnsern Herren von walseh Den wir in gegeben haben vmb dritthalb hvndert ph
unt phenning wiener mvinze Der wir gantz vnd gar verricht sein vnd gewert Vnd luten auch in
daz wir des selben Pvrchrechts den selben Herren wellen gewer sein als des landes recht ist in ostirreich Vnd
tet in des nicht swelhen schaden sie des nemen den schulln sie haben auf vns vnd auf vnser Erben vnd auf
all vnser gvet daz wir haben in dem Lande zv ostirreich Vnd daz in die red stet vnd vngebrochen
bleibe des geb wir in disen Prief versigelt mit meim Insigel vnd mit meins Svns Insigel Hn Hainreichs von
Ymmendorf Der ist gezevg Dietmar d(er) Holtzman P(er)chtol(d) von Gerivnt Eczzel von Patzmanstorf Gotfrit von
harras Volkel von harras Gotfrit von harras Chvnrat d(er) Gvmping vnd and(er) erb(er) Levte gnvg Der Prief
ist geben nach Christ gepvrt drevzehenhvndert Iar nach in dem drevzigisten Iare an sand Lavrentzen tage