Ich Leytbgart von Wartenuelse Vnd ich Marchart von Mystelbach ir sun Vnd ich Erchonprecht von Mystel
bach ir sun Wir iehen vnd tůn chůnt Allen den die disen prief sehent oder horent lesen Daz wir mit
bedahten müt mit gesampt hant mit vnser pesten frůnde rät vnd mit vnser Erben gůtleichen willen zü den
zeiten da wir es wol getůn mochten haben geben den erbern herren vnd dem Hause zü Meinnperch sand Johans
orden Vnsirs rechten aigen fůnfthalb phunt phenning geltes vnd sechzthalb vnd dreyzig phenning geltes wiener
můntz die da ligent zü Chompstorf auf vier lehen vnd auf ainer hüben vnd alles daz dar zü gehort zü veld vnd
zü dorf gesucht vnd vngesucht mit allem dem recht vnd wie es gehabt haben die man dient alle Jar halb auf
sand Jorgen tage vnd halb auf sand Michels tac Die hab wir in geben zü ainem Almusen vnd zü ainem ewigen sel
geret durch got vnd durch vnser sele paitte vnd aüch aller vnser vodern sele wille Vnd loben den vorgenanten
Herren vnd dem Haus zü Mainperch wir vnd all vnser erben vmb die selbe gulte rechten schirm für alle ansprach nach des
landes recht in ostirreich Vnd ob die selben herren des geltes dahain chrieg oder dahain ansprach gewunne swelhen schaden sie des
nemen mit recht den sie gesagen mogen pey iren trewen den schulle wir vnd alle vnser erben in ablegen nach des landes recht
in ostirreich tůt wir des nicht so schulle sie ez haben auf all vnser gůt vnd auf aller vnser erben gůt daz wir haben in
dem lande zü ostirreich Vnd swer aüch zü den zeiten landes hre ist in ostirreich der schol in dez gehelfen mit vnsirm gůtleichen
willen Vnd daz in die red stet vnd vnzerbrochen bleib dar vber geb wir in disen prief v(er)sigelt mit vnsirn aller
dreyer Insigeln diser sache sin gezeuge Her Chůnrat von Kęvow Her Marchart von Mystelbach her Erchonprecht
von Ebnstorf zü den zeiten obirster Camerer in ostirreich vnd her weykhart von Wynkel die diser sache
sin gezeug mit iren Insigeln Vnd ander erber leute genůg den dise sache wol chůnt vnd gewissen ist Der
prief ist geben nach Christ gepůrt dreyzehenhundirt iar darnach in dem drey vnd dreyzigisten Jare an sand
Gregorien tage des heiligen pabstes