Ich pruder Vlrich von Puchberch zu den zeiten Maister zu Haimpach Vnd der erber Conuent da selbs
Von Iuehen vnd tun chunt allen den die disen prief lesent oder horent lesen Daz vns hat geben bruder
Chunrat von Schizenberch zwen weingarten drev viertail in der Bosenpiunt vnd drev viertail in weig
leins weingarten vnd zehen schillinge phennig gotes wiener minnz die da ligent zein Ozzols auf
ain vnd zwainzich gewanten aechre vnd die man dient alle Iar an sand Iorins tag also beschaidenlich
daz wir schullen begon alle Iar vnser vrowen tag als ir gedacht wart lobelich mit alle sachen dar
zu schaft er drei schillinge phennig dem priorn vnd dem conuent des selben tages zu pitanz dar
vmb daz sie dest williger vnd dest vlezziger sein zu begon den selben tag Wir schullen auch geben des
selben tag ^?^ zwen phennig haus armen leuten durch vnser vrowen willen Vnd man schol auch
haben vor sand Katherin alter ain lampen vnd ain ewige nacht liecht vnd swaz des vber ist daz schol
man legen an die chamer die bruder Chunrat gemacht hat in dem Hause zu Haimpach als verre ist ge
weren mach Ez schol auch des selben guets niemant in nement noch ausgeben sein nur der priester den
bruder Chunrat gesat hat auf sand Katherin alter Ez schol auch der selb priester nicht in dem gu
te wandeln noch schaffen nur mit des conuents vnd des priors rat vnd gewizze Vnd ob daz daz
dehain prior in dem Hause wer daz got nicht engeb der daz selb selegraet saumpte vnd hindert den schol man
habn fur aine vngehorsame bruder vnd man schol in dar vmb puzzen mit des ordens recht in dem hause
zu Haimpach Wer auch daz ez der maister von Haimpach selbe tet daz er iz saumpte vnd hindirt so
schol in der conuent gemaine rat vmb zu rede secze fur dem obristen maister Vnd schol auch furder daz selb
selegraet so schol mit bruder Chunrat glichen tail habn an dem puzzen Daz nu die rede stet vnd
vngbrochen bleib dar vber geb wir disen prief besigelt mit vnsers conuents Inssigel vnd mit min
pruder Vlrichs von Puchbach Inssigel zu den zeiten vnser maister zu Haimpach Der prief ist gebn nach
Christi gepurt dreizehenhundert Iar darnach in dem funf vnd dreizzigiste Iare an sand Iorgen tage ;