Ich Hainreich der Schad. Vergiech vnd tůn chunt allen den die disen brief lesent oder hoirent lesen. die nv lebent vnd hernach chünftich sind. daz ich mit
aller meiner erben gůten willen vnd gunst. mit verdachtem mvt ze der zeit do ich ez wol getůn mochte. Verchauft vnd geben han meins rechten aigens an Aem
geheming Dreizehen schilling wienner phenning gultes. die da ligent ze Andern Holabrunne auf ainer Hofstat vnd auf weingarten. vnd auf vberland akchern
vnd auf ainer wis. vnd han dar zv verchauft vnd geben meins rechten aigens. anderthalb Jauchert akchers die da ligent da selbens ze Andern Holabrunne. Die
vorgenanten anderhalb Jauchert akchers vnd die egenanten Gulte. han ich stæt vnd redleichen verchauft vnd geben mit allem dem nutz vnd rechten. als ich sy
alles in aigens gewer her pracht han vnd als ez von alter her chomen ist. vmb Viertzehen phunt wienner phenning. der ich stæt vnd redleichen
verricht vnd gewert pin. Dem Edeln Herren Graff Hainreichen von Schaunberch ze den zeiten obrister maister sand Johans orden ze tewtscher
Comitew daz sand Johans in der chærner strasse ze wienne. vnd swem er sy mit disem brief læst oder git furbaß ledichleich vnd ewiclaichen ze
haben vnd allen seinen frumen da mit ze schaffen verchauffen versetzen vnd geben swem si wellen an allen irrsel. Vnd dar vber durch pesser sicherhait so
setzen wir vns Ich Hainreich der Schad vnd ich Dietreich vnd ich Hainreich die brüder von Etergössingen sein Ohaim vnuerchaidenleichen mit sampt
allen vnsern erben vber die vorgeschriben Gulte. vnd vber di anderthalb Jauchert akchers ze Andern Holabrunne. dem vorgenanten Edeln Herren Graff
Hainreichen von Schaunberch. oder swem er sy mit disem brief læst oder geit ze rechtem gewær vnd schirm fur alle ansprach als aigens recht ist
vnd daz Landes recht ze Osterreich. Wær aber daz si mit recht an dem obgenanten gůt icht chrieges oder ansprach gewunnen von swem daz wær daz
schuln wir in an allen irn schaden alles an richten. Vnd schuln auch si daz haben auf vns vnd auf allem vnserm gůt. daz wir haben in dem Lande ze Oster
reich. Vnd daz diser chauf furbaß alls stæt. vnd vntzebrochen beleib. dar vmb so geben wir in disen brief ze einem wæren sichtigen vrchunde
vnd ze ainer ewigen vestenung versigilt mit vnserm Insigeln. Vnd mit der Erbern Herren Insigeln hern Chůnrat von Ebersdorf. vnd hern weichart
von Toppel ze den zeiten Lantrichter in Osterreich. die diser sach gezeug sind mit irn Insigeln. Diser brief ist geben ze wienne nach Christes
geburt Dreutzehen Hundert Jâr da nach in dem ain vnd viertzigisten Jâr des Erichtages in der andern vastwochen.