Wir Purchart Otte Perichtolt und Purchart Purgrafen ze Maidburch und Grafen ze hardekke. vergehen und
tun chunt allen den die disen brief lesen oder horen lesen. umb die vierdhalb phunt wienner phenninge geltes die
rechtes aigen sint und die da ligent ze Libenshuten auf drithalben Lehen und auf sechs hofsteten. die ul
reich der Ortutzendorffer. und vrowe Margret sein hausvrowe. und hans. hervey. Elzbet und Agnes der selben
vron Margreten chinde ze chouffen geben habent. dem erbern gaistleichen manne. pruder Otten von wienne
sant Johans Ordens und dem selben seinem Orden und dem haus ze Maillperge. umb siben und dreizzich phunt
und umb sibentzich phenninge wienner munze. da mit si die selben Gult und ander Erbe gelost habent von den
Juden Dar umb so haben wir der vorgenanten vron Margreten und irn chinden. die gnade und die fudrunge
getan. und haben fur si dem egenanten pruder Otten und seinem Orden. und dem haus ze Maillperge. uber
die vorgenanten vierdhalb phunt geltes ze Ehenteur und ze scherm gesatzt unsers rechten Aygens an
sechtzich phenninge vier phunt wienner phenninge geltes gelegen ze Ruprchtstorf bei Dumpach. also mit
ausgenomenr rede. ob daz waer daz pruder Otte oder sein Orden an den egenanten vierdhalben pfunden
geltes icht ansprach gewunnen. so ist daz unser gut wille daz si sich denne der egenanten unser gult ze
Ruprchtstorf ze hant. suln under winden. und suln die denne inne haben und nutzzen als ir aigenhaftes
gut. als lange untz daz in die vierdhalb phunt geltes gantzleichen ledich und aus gerichtt werden vor allem
chriege und vor aller ansprach. und suln auch wir und unser erben unuer schaidenleich der vorgenanten vier
phunt geltes an sechtzich phenninge. ir recht gewern und scherm fur alle ansprach. als Ehenteur und schermes
recht ist und des landes recht ze Osterreich. und dar uber so geben wir Graf Purchart der alt
Graf Otte. Graf perichtolt. In disen brief zu ainem warn urchunde diser sache unser sigilt mit un
sern Insigiln. und wand wir Graf Purchart der Junge nicht aigens Insigils haben so verpinten
wir uns mit unsern trewen under unsers vetern und pruder Insigiln. alles daz staet ze haben und
ze laisten daz vort an disem brief geschriben stet. Diser brief ist geben ze wienne nach Christes ge
purt dreutzehen hundrt iar dar nach in dem zway und funfczigisten iar an sant Jacobs abent . : .