Wir P(ru)d(er) Gall(us) von Lemberg Sand Johans orden P(ri)or zu Pehem Und ich P(ru)d(er) Rudig(er) von Wildungsmau(er) zu der zeite Com(m)endewr zu Donawd(orf) Und der Conuent gemain aller P(ru)der
da selbs Wir veriehn und tun chunt an disem offen prief alln lewte(n) Daz unser Pfar(r) lewt dacz Donawd(orf) und anderswo in dem nachste(n) sterbn so vil ir(e)r güt(e)r gebn habn P(ru)d(er) Eyrharte
die zeit unse(r)m P(ri)or zu Donawd(orf) daz man dar umb gechauft hat Sibn phunt gelts an guten und wigtige(n) phenning(en) Und der da ligent dritthalb phunt und funf und zwainzich phenning
zu Harlain Und zu Hawtzestorf zehn schilling gelts zu Nidi(n) Holabrun zwelf schilling und zwainzich phenning gelts zu Eytzengsdorf aindlif schilling und drei phenning gelts Daz
gelt alles habn die vorgenante(n) unser Pfar(r) lewt gegebn durch got und durch ir(e)r sel hail willn da mit sie gestift habn die seligen gestift die hie nach geschribn stet Und dez selbn
gelts schol in nemen und aus gebn sein(er) wer Cechmaist(er) ist zu Donawd(orf) auf Sand Chwnigunde(n) Perch Und dem unser ampt lewt dacz vorgenante güte daz gelt raichn schuln zu den tagen
und man ez von reht diene(n) schol Und habn die vorgenante(n) unser Pfar(r) lewt mit dem gelt daz gestift also daz dem chappellan auf Sand Chwnigunde(n) Perch von Harlain alle Jar an Sand
Michels tag gewaltn schol ain phunt phenning zu der gestifte(n) messe als ander prief sagn Und sechs schilling gelts zu dem liecht daz dez nachts prinnen schol in Sand Michels chappelln
bei der rechte(n) Pfar(r) Und dreizich phenning schol man alle Jar gebn den Schülern die an dem Chortem(m)p(er) tag und an dem Samstagt dar nach den Salt(er) lesen bei dem grab Und sechzig phenning
umb vir phunt wachs zu den liechte(n) die an den selbn tage(n) bei dem grab prinnen schulln Auch habn die vorgenante(n) unser Pfar(r) lewt gestift daz man alle Suntagt nach der Vesper bei der rechte(n) pfar(r)
schol umb gen mit gesang und sprengen und rawchn und vor dem Chreuz sprechn ain Placebo Und dar nach an dem chreithof auch umb gen Und schol man singe(n) ain sel ampt dez morgens vor
dem rechte(n) ampt in der egenante(n) Sand Michels chappelln zu trost ir(e)r sel und all(er) gelaubige(n) seln Und habn auch gestift daz man alle Vreytagt hin vor in der chwchn auf ainem and(er)n alter
sing(en) ain messe von dem heylige(n) Chreuz dez morgens auch zu rechte(n) frümess(e) zeit Und alle Samstagt auf unser(er) vrowen alter ain messe von unser(er) vrowen Auch zu frümess(e) zeit ez wer dann
ob ain groz hochzeit geviel an der tag ainen oder ob ain solerch leich wer da von die Pfar(r) schade nem oder ander gescheft not daz man der messe nicht gesinge(n) mocht so schol man ez un=
derwegen lazn Auch habn sie gestift daz man alle Jar in dem aduent und in der vasten alle tag sing(en) ain messe von unser(er) vrowen chündung Und welch(er) Priester an seiner wochn die vorgenante(n)
messe singt ez sei dez Vreitags dez Vreytags dez Samstags in dem aduent und in der vasten dem schol der obgenant Cechmaist(er) ymer raichn von der messe drey phenning Und zwain Schölln die
da helffn zu singen zu den vorgenante(n) messen alle wochn sechs phenning die in der selb(en) Cechmaist(er) auch raichn und gebn schol für ir(e)r mü Auch habn sie gestift daz man ewichleichn vir stund in dem
Jar ymer dez Mitwochns in den chortemp(er)n schol dez nachts Vigilj singen mit drin letzn auf Sand Chwnigunde(n) Perch Und nach der Vigilj umb gen auf dem Vreythof und sprenge(n) und rawchn
und sprechn auch ain Placebo Und dez morgens an dem Phynztagt dar nach schol man singe(n) ain sel ampt Und aber umb gen als vor zu trost aller der sel der leichnam da rast und aller gelaubige(n) seln
Und dar umb daz daz selgert alles als vor geschribn stet mit vleiz bestugt wert schol der vorgenant Cechmaist(er) dem P(ri)or da selbs gebn ymer zu der chortemp(er) zwainzich phenning Und Schüllmaist(er)
acht phenning Und zu der selbn sel messe schol der Cechmaist(er) zu ainer yegleichn chortemp(er) zu opher gebn zwainzich phenning Und umb almusen arme(n) lewte(n) dez selbn tags funfzehn phenning Und waz
auch der Cechmaist(er) aus geit dez gelts zu der vorgenante(n) stift daz schol alles geschechn mit dez P(ri)or wizzen Und dar umb schol in der Cechmaist(er) selb(er) behaltn alle Jar vir und zwainzich phenning
für sein mü Und wer auch ob der Cechmaist(er) an dem gelt sawmich wer und daz er daz zu der vörgesprochn stift nicht raicht als er pilleich scholt und als vor geschribn stet so schol in ain Com(m)d(ewr)=
tewr der dez Hawses gewaltig ist da zu note(n) ez wer dann ob in gescheft not hindert daz daz gelt nicht geualln mocht von unse(r)n oder von and(er)n gescheften sachn so schol er beleibn ungemüt So
hat der vorgenant P(ru)d(er) Eyrhart amen Memori(e) mit unse(r)m urlaub und der da leit in dem Peringrund den er bei seine(m) lebn nach selb schol in habn Und in nütze(n) den hat er gebn mit un=
se(r)m urlaub nach seine(m) tot den P(ru)d(er)n und dem Conuent zu der Pittantz also swer Pittantz maist(er) ist der schol mit sampt den and(er)n P(ru)d(er)n alle Jar begen ainen Jartag an Sand Philips
und an Sand Jacobs tag dez nachts mit der Vigilj mit newn letzn Und dar nach dez morgens schol man singe(n) ain sel ampt Und die and(er)n Priester waz der ist die schulln den selbn tag gemain=
chleich sel messe sprechn alln unse(r)n stifte(n) Und dem egenante(n) P(ru)d(er) Eyrharte und alln unse(r)n P(ru)d(er)n und alln den die unse(r)n ordn ye gütleich getan habn Und dez selbn tags schol der Pittantz mai=
st(er) dem Conuent und den P(ru)d(er)n Pittantz gebn dez morgens und dez abents Auch schol der Pittantz maist(er) dez selbn tages gebn drei schilling phenning dem P(ri)or und den and(er)n Priestern
da selbs daz sie von dem selbn tag nach enander an underlaz sprechn dreizich sel messe durch der vorgenante(n) sel hail willn Und wer ob aines Jares reht ubrig wurt in dem vorgenante(n) Mem=
ori(e) uber daz P(ro)vi(n)ci(al) und uber daz alles daz zu der gestift gehort als vor geschribn stet daz schol man sparn und behaltn in ain ander Jar ob dann dar an icht prechnt wer daz man daz dann da
mit erfullt Und wer auch ob die Priester die gestift nicht stet hieldn und begiengen als sie pilleich scholtn und als vor geschribn stet Und daz sie dez selgert liezn abgen Wer dann Com(m)d(ewr)=
tewr ist dez Hawses zu Donawd(orf) der schol sich dez gelts und der nutz aller underwindn dez selbn Jares die zu der vorgenante(n) stift gescheft sint Und schol die als lang in habn
unczu daz daz alles volleichleich wid(er) tan wert also daz ez pilleich volpracht wert als ez gestift ist Wann daz geschecht so schulln die nutz alle wider geualln an ir rechte stat
Und daz dise red stät beleib dar uber geb(e)n wir disen prief besigeltn mit unse(r)m Insigel der vorgenante(n) P(ru)d(er) Gall(us) von Lemberg Und mit dez obgenante(n) P(ru)d(er) Rudig(er) von
Wildungsmau(er) die zeit Com(m)d(ewr) zu Donawd(orf) Und mit dez Conuents Insigel da selbs Der gebn ist nach Christ(i) gepurt dreuzehn hundert Jar dar nach in dem acht und funfzigisten
Jar an Sand Georign tag