Ich Jans hern Paltrams svn vnd avch mein hausvrowe der Chlarner vnd alle vnser erben wir veriehen offen
leichen an disem brief vnd tven chvnt allen den die disen brief lesen oder horent lesen die nv lebent vnd her nach
chvnftich sint. daz wir mit gvetem willen vnt mit verdahtem mvet vnd mit gesamter hant den brvedern des
heiligen orns von sant Johans Baptiste von Jerusalem vnd dem haus daz da leit zemer Loch zechauffen haben gegeben
den Pavngarten der da leit in der lantstraz vor der stat ze wienen der mein rehtz erbe ist gewesen von meinem vater
hern Paltram vmb vierthalb fveder weins vnd vmb zwo march silbers. vnd habent vns der gewert reht vnd redleich
daz wir sev nihtes enzeihen. vnd also mit dem Pvrchreht da von zedienen als wir ez ennher da von gedient haben
daz sint sehzich phenninge daz wir alle ierchleich an sant michelstach meiner vrowen der herzzoginne da von zerehtem
pvrchreht dienen svln. Daz disev rede also stet sei vnd immer vestichait hab vnd von niemen her nach verwandelt
noch zebrochen werde. Dar vber geb wir den vorgenanten prvedern disen brief ze einem bestatigen vrchvnde diser
sache. vnd bestetigen in den versigelt mit vnserm insigel vnd mit vnsers ohaims insigel hern Paltrams des Vozen.
Des ist zeuch her pilgreim hern paltrams svn der dv rihter was. her hainreich von pratenfelde. her hainreich hern paltrams
svn. her chvenrat von valchenstan. her Leimpreht von Eberstorf der dv selben mvnzmaister was der Paltram avf der
slachstvben. der Paltram hern pilgreims svn. her pilgreim sein brveder. her Fridreich der schrannschreiber. her Paltram von valchn
stain. vnd vlreich der Smvcher vnd ander piderb levt genvech. Der chauf ist geschechen do von christes gebvert warn
Tavsent iar. Zwai hvndert iar vnd in dem oht vnd nevnzistem iar an sant merteins tag