Ich Niclas der Ziegelprenner Vnd ich Greid sein Hausvrow Wir vergehen vnd tůn chůnt allen den die disen brief
lesent oder horent lesen die nu lebent vnd hernach chunftig sint Daz wir mit vnser aigen gůten willen vnd gunst
mit verdachtem můt Vnd mit gesampter hant zü der zeit da wir es wol getůn mochten ze rechter Ewentewr
gesatzt vnd verschriben haben dem haws datz sant Johans in der chärnerstrasse ze Wienne vnsern weingarte gele=
gen an dem Newst ze nähst Ortolfs weingarten vnder dem Nussawn des auch die Erbern Gaistleichen herren
da selb datz sant Johans recht grunt herren sint ze stiften vnd ze stören da man auch von dem selben vn=
serm weingarten alle Jar dient dem obgenante haws datz sant Johans dyn vnd zwaintzich wienner phenninge
ze Gruntrecht vnd nicht mer Den vorgenante vnsern weingarten haben wir recht vnd redleichen ze rechter
Ewentewr gesatzt vnd verschriben des egenanten haws datz sant Johans vber die funf vnd dreissig wienner
phenning Gelt Gruntrechts die daz selbe haws datz sant Johans hat auf vnserm weingarte der auch gelegen
ist an dem Newst ze nähst Petreins weingarte des Jekleins des auch die obgenante erbn gaistleichen herren
datz sant Johans recht Gruntherre sint ze stiften vnd ze stören Also mit ausgenomenen rede dwaz dem
vorgenanten haws datz sant Johans der egenanten funf vnd dreissig phenning gelts Gruntrechts hinfür
an dem obgenante weingarte ab get daz sol es haben auf dem vorgeschriben vnserm weingarte den wir in ze
Ewentewr gesatzt vnd verschriben haben wir sein lebentich oder tod Vnd sein auch wir vnd vnser erben verphächt
denleichen der vorgenante Ewentewr des obgenante haws datz sant Johans ze rechter gewer vnd schirm für
alle ansprach Nach des lants recht ze Osterreich Vnd wenne wir selber nicht aignes Insigils enhaben Vnd in
auch die vorgenante vnser Gruntherren mit irn Insigil selbe nicht bestäten möge dar vber so geben
wir dem obgenanten haws datz sant Johans in der chärnerstrasse ze Wienne disen brief zü einem wärem
sichtigen vrchund diser sache versigilten mit der erbern herren Insigils hern hainreichs des stricher zü de
zeiten purgermaister ze Wienne vnd hn Jansen an dem chienmarkte zü den zeiten stat richter ze Wienne
vnd auch hn waldheins Insigil des yerdungs phing ze Wienne die wir des fleissichleichen gepeten
haben daz si diser sache gezeuge sint mit irn Insigils vnd verjeint auch wir vns mit vnsern trewn
vnder der egenante Insigils alles daz gäntzleichen stät ze haben vn ze laisten als vor an disem brief
geschriben stet Der brief ist geben ze Wienne nach Christes gepurde dreutzehen hundert Jar dar
nach in dem Newn vnd funfzigisten Jar des nächsten phintztags nach vnsr Vrown tag als si ge=
porn ward :-)