Wir Hans von Tyrna zu den zeiten purgermaister und Rathsmaister und der Rat gemain der Stat ze
Wienn Verjehen offenleichen an disem brief umb Wolfgarten der noch zu seinen velligen Jarn nicht chomen ist
Wolfharts sun auf der Widen dem Got gnad daz wir durch trew lieb und pet sein nachsten und pesten freunden
als da waz genanten hern Hansen von Tyrna und hern Otten und hern Herman von Eslarn und Andras mulner
Herzog Albrechts chamrer ze Osterreich selich und frowen Jethilden seiner hausfrown und Chunrats des Eslar
und frowen Chungunden seiner hausfrown die paid des abgenanten Wolfharts recht mumen hieant seiner muter
seligen swester und gemainchleich durch vleizziger pet aller sein freunt in sand Johans Orden mit laib und
mit guet geben haben und die alle vor offen Rat offenleich habent gesagt stetz mit uns dem egenanten Wolfgarten
taten daz wær alles ir gutleich wille und ir vleizzig pet Und auch dieselben Gaistlichen herren sand Johans
Ordens den egenanten Wolfgarten durch Got und unser pet willen und auch der freunt pet willen mit
laib und mit guet in irn Orden enpfangen habent Und des zu ainem urchunde und zu ainem gezeug
geben wir den erbern Gaistlichen herren dem Convent gemain des hauss sand Johans in der
Chærnerstrazze ze Wienn und irn nachchomen disen brief versigilten mit unser stat chlainem anhangunden
Insigil Der brief ist Geben ze Wienn Nach Christs geburde drewzehen hundret jar darnach in
dem drew und sechzigisten jar des nachsten sampztage nach unsers herren Gotes Leichnam tage