Wir nochgeschrebn Jorge Reybencz hawptman in Nympzer lande Kuncze Reychel Otto Pachelbycz
hanns ffyche hofferichter ouch in Nympzer lande Bekennen mit desym offen brieffe Allen den die
sehen horen adir lesen Das wir den Edelen ffriedrich von Pachelbycz In ganczer volkomener macht
Alle seyner bruder Ern hanns von Pachelbycz des Eldysten Crystoff vnd Segmund der Jungesten gebruder
In kegenwertikeyt katherinen Pachelbyczin ir mutter an eyme vnd den Ebrdige(n) h(er)n Andris Lemberg
Stadhelder vnd Co(m)ptur czu Breclaw Bruder sand Johann(is) Orden an dem and(er)n teyle Gancz vnde gar
ouch in volkomener macht bericht haben alzo von des gut clegen Boraw vmb alle ansproche vnd gebrechn
die sy keygen enandir gehabt haben kleyn adir gros Wie man ouch dy benennen mochte keyns awsgenom(en)
do sy denne meynten die do vorgessen wern in dem kawffe Alß erbcynse in geldis adir getreydis ebeyse
Wo is hanget adir langet dis dy benant(e)n von Pachelbycz besuczen sullen Alß der benante Stadhelder vnd seyn
Orden das besessen haben vor firczig Jaren Doru(m)me her den gebrudern von Pachelbycz vnd irer muttir
eyne Su(m)me in geldis vnd getreydis ebeyse gutlich vortret(e)n vnd beczalet hot vnd ouch seyne eygen schult
cze fuste dulosse(n) hot vnd wo sy en hin gelleytet hab(e)n czu Breclaw vnd czur Sweidnicz Awsgenome czehn
marck die sy schuldig seyn dem h(er)n Olbrecht von Coldicz hawptman czur Sweidnicz an(e) suldir vndirscheyt
das dy gebruder mit ir muttir von Pachelbycz dem oftebenant(e)n Stadhelder vnd seyme hawse czum heylig(e)n
leichnam vor Breclaw vormachen sullen mit eynem kuniglichen briffe fyer marg geldis vmb dreyssig
marck grossch(e)n vnd vmb czehen marck hellir uff eynen wedirkawff uff dem gute czu Boraw vnd czu den
czinsen daz sy das gut czu gange mogen brengen Sollen dy von Pachelbycz haben fyer Jar freyheyt als von
dato deses briffs Das eyn sulcher ansproch Stete vnd gancz gehalden moge werden haben wir obinbenant(e)n
Jorge von der Reybencz hawptman In Nympzer lande Kuncze Reychel vnsir Segil Ouch mit dem Segil
des Edeln h(er)n ffriedrichs von Pachelbycz lossen hengen an desen briff Der do gegebin ist noch Cristi geburt
fyerzcenhundirt vnd in dem eynvndfirczigst(e)n Jarn an dem Sontage Oculi Do bey seynt gewest Cristoff
von kacz Bruder petir Co(m)ptur czum Tyncz Bruder Johann(es) Cille pharrer doselbst Anthonius von pol
kenhayn Nickel Szeysberg hanns aressigloher vnd andir vil fromer lewthe
Z