Ich Joannes doryng bruder des ordens sanct Joannis von Jherusalem vnd
Comptur des hauses zwm heiligen leichnam vor breslaw bekenne
offintlich mit disem briue das yn meyner kegenwartykeit do Jorge
Otthe schultz züm Newdorffe mit de(n) hir noch geschryben scheppe(n) kirstan
pusch Casp(ar) monch Merten firma Cristoff Jnghe Brüger Maternitz do
selbist ding sassin Bestand(en) hot ym gehegeten dinge Jacob Tritt meyn
vnd(er) sesse vnd hot vffgezeicht de(n) sychen bruder(n) yn die infirmaria
vnsers hauses viiii grosschen Järlichs zinses vff eyme morge(n) acker(s)
de(n) he hot yn dem obgnanten dorffe gelegen tzwisschen Merten firmas
vnd hans bockerow erben vmb vi m(ar)ck heller Do von globeth der obge
nante Jacob Tritt vor sich vn(d) vor alle noch komelighe zwo geben alle
Jor gleich an alle hyndernis vn(d) bey der pfandunge die selbigen viiii
grosschen vff Visitacionis marie Vnde zo der obgenanthe Jacob Tritt
adir syne noch komelyghe vor mag abezwlosin die selbigen viiii gr(osschen)
So sal man ehm das vorgonen abezwlosin vmb vi m(ar)ck heller ganghafftige
müntze vorfessen zinses vnschedelich vn(d) sunderlich des Compturs erbezinses
Des zwo mehr geczeugnis habe ich obgenant(er) Comptur meyn Jngesygell
an dysen bryff lossen hengen Geben noch cristi geburth tausent funff
hundirth vnd ym sechcze(n)den Jare feria sexta ante penthecostes ~