Ich Joannes doring bruder des ordens sanct Joannis von
Jer(usa)l(e)m vnd Comendator des hawß zwm heilige(n) leichnam
vor breßlaw bekenne offintlich mit diesem briue das
yn meyner kegenwertikeit do Jorge Otthe Schulcz zwm
newndorffe mit den hije nachgeschrebe(n) Scheppen lloretz
baker lloretz mittman Mathis polman Berndme roms
keler Adam romskeler do selbist ding hoßin bestanden
hoth ym gehegethen dinge Hans franke meyn vnd(er)
sesse vnd hot offgerocht Bruder valente(n) Scholz meyne(n)
schaffez zw der pytancie(n) vnßerm hawße eyne(n) fir
ding Jerliches zinses off eynen morgen ackers den
her yn dem obgenanten dorffe hot gelegen zwoneste
Jokob kittels erbe vn(d) zwoneste der fir worde Zwo gebe(n)
alle Jor gleych an allis hynderniß vn(d) bey der phan
dunge den selbige(n) firding off walpurge vnde szo
der obgenanthe Hans franke adir syne nochkomelin
ghe vormag abzwlossen den selbigen firding szo sal
man ehm das vorgönnen abzwlossen vmb iiij m(ar)cg
heller ganghafftiger mwncze vorseßen zinsen vn(d) sche
delich vn(d) zundelich des Comendatours erbzinsen des
zw eyne(n) geczewgniß habe ich obgenanter Comendator
meyne(n) yngesygell an dyssen briff lossen hengen Gebe(n)
nach Cristi geburth Tawsentt funffhundertt vn(d) ym
elfften Jore de(n) nesten montag yn der Crewczewoche