Ich Hainreich von spiegelveld tvn chunt allen den die disen brief an sehent daz ich den prvd(er)n von sant Johans orden von dem spital von
ierusalem vnd ovzgenomenleichen den prvd(er)n von fvrstenvelde vf gegeben han durch miner sel hail ze einem rechtem selgeret die
vogtay die ich gehabt han ovf ain gvt daz gelegen ist ze puchel an der lomnich mit so ovzgenomer red daz ich vnd alle mein erben
fvrbaz niht ze schaffen svln haben mit dem gvt noch mit der vogtay Daz dise gab stete si vnd vnverbrochen des gib ich in disen
brief mit meinem insigel vnd mit der minner prvd(er) insigel von pruck ze einem vrchund der barhait des sint geziuch p(ro)der
perchtolt der Gardyan von pruck p(ro)der Haydenreich p(ro)der Andre von wienn p(er)nel von pruck Leupolt von pruck Leu
tolt der cheri Hainreich der novgner Dytreich spiegelvelders chelner Walther der vischer Fridel spiegelvelders chnecht Hain
reich der fverer vnd ander erber livt diser brief ist gegeben nach vnsers herren gebvrt vber tausent iar vnd zwai hvndert
iar nivnzich iar vnd fvmf iar An dem samztag dez ingenten mayen