Ich Stephan Wulfing der prewter sun mein Geswistreide Walther der Gogelhart Leupolt der Garter und alle uns(er)
erbn veriehen offenleich und tun chunt alln den die disen prief ansehent lesent oder horent lesen daz wir
ainmutichleich mit unserm mut freyleich und unbetwungenleich zu den zeiten do wir ez wol getun mochten mit gut(er)
willn rat und gunst aller uns(er) freunt habn geschaft und gegebn dem haus sand Johans ordn zu Furstenueld zu Hantsen
dem Zinderstain(er) chomentur zu den zeiten da selbs und alln den chomenturn die hernach dem haus chunsig werdn
ain achker gelegn nebn der chroppin achker an dem miter weg der vier tagwerch sint und ain achker gelegn nebn
dez Haimrecs dez Haimizer achker ob der wolfs grub der zway tagwerch sind und ain achker nidert halbn dez chreutz
achk(er) gelegn nebn dem zeigern dem Heunelber der vier tagwerch sind und ain achker auch da selbs gelegn nebn
Andres ungruns achker auch nidert halb dez chreutzachk(er) der vier tagwerch sind und ain stadel und ain garten
der gelegn ist nebn Niclas dez chuschelpecks stadel und ain achker der gelegn ist nebn dez haus achker sand Johans
ordn der vier tagwerch sind und auch ain weingartn der gelegn ist an dem altn percht nebn percht dez prunner
weingartn der gut sam sie da vorgeschribn stent seczen wir uns ainmutichleich und gebn sew auff dem vorgenanten
haus zu Hantsen dem Zinderstain(er) und alln den die hernach daz haus an chomentur stat inn habnt mit alln den
rechten nuczen und zugehorn sam ich sew der vorgenant Stephan und Wulfing der prewter mein vat(er) unz h(er) pracht
pesessen und genossen habn also daz sew da mit schulln schaffen und tun wie sie wellen recht sam ez ir aygenleich gut sey
Wer aw(er) daz der vorgenant h(er) Hans der Zinderstain(er) oder wer daz haus an chomentur stat inne hat der vorgenantn
gut icht zu schadn cham oder chain schadn nem ez wer von anspruch oder von chain(er) andern sache wegn wie d(er) sach genant
ist den schulln wir in willechleich gar und gancz ablegn und auff richtn an alln chrieg und neytayding ob daz icht nicht
geschach daz wir in die schadn nicht welln ablegn noch auff richtn sam da vorgeschribn stet so schulln wir veruallen sein
dem Haupman in Steyrn der zu den zeiten Haupman ist oder wer sein gewalt hat funfczig phunt gut(er) wienn(er) phennig
und dem egenanten haus oder wer ez inne hat an chomentur stat auch funfczig gut(er) wienn(er) phennig der schulln sie der
Haupman oder wer sein gewalt hat manen und wern von alln den uns(er)n habn ez sey erbgut od(er) varnds gut wo
sew dar auf weysent oder zaygnt mit uns(er)m gutn willn an alln chrieg neytayding und wider red daz schulln sew habn
zu uns zu alln den uns(er)n habn und daz uns(er)n erbn an aydes stat an all geuar und daz die gelub also stat wair
und unzeproch(e)n beleibn so hab ich der vorgenant Stephan Wulfing der prewter sun mein Geswistreide Walther
Gogelhart Leupolt der Garter und alle uns(er) erbn dem egenantn haus zu Hantsen dem Zinderstain(er) und alln den
die hernach daz haus an chomentur stat inne habnt disen prief beuestigt und bestatigt mit dez erbn mans
Niclas dez chuschelpecks zu den zeiten richter zu Furstenueld an hangendn Ingsigel und auch mit dez erbn mans Hantsen
dez peulers purger zu Furstenueld aygn an hangendn Ingsigel versigelt die sew alle payde ainmutichleich durch
uns(er) pet willn her an disen prief gehangen habnt an all geuar in und alln irn erbn an schadn der prief ist gebn
nach chirstes gepurd drewzehn hundert jar dar nach in dem acht und sechczigistn jar an dem nechsten freytag
nach sant Lucien tag der heilign Junchfrawn