Wir ferdinand von gottes genaden Römischer khünig zü allen zeitten merer des reichs in Germanien zü hungern Behaim dalmatien croatien (et)c(etera) khünig Jnnfant in hispanien /
Ertzhertzog zü Osterreich marggraue zü merhern Hertzog zü Lützenburg vnd in slesien marggraue zü lausitz (et)c(etera) Bekhennen offenlich mit disem brief vnd thüen khünt meniglich Nachdem wir ver=
schiner zeit aus Regieründer Behemischer khünigclicher macht vnd alls collator das oberst Behmisch priorat der ordens Sancti Joannis Jherosolimitani durch Behaim Merhern Slesien lausitz
polen Osterreich steyr khärnten vnd Crain dem wolgebornen vnserm chamrer vnd lieben getreüen Zbinko Berka von der daub auf Strakonitz aus sonndern khünigclichen gnaden conferiert vnd gnedigst
gegeben wie dann er Zbinko Berka vermüg derselben vnser collatur die possession vnd verwaltung solhes priorats vnd herrschafft durch vnsere ordenliche mandat entpfangen erlangt eingefürt vnd
habhafft gemacht worden Jne auch das gantz conuent gemelts ordens angenemen Darauf seind wir von genantem Zbinko Berka vnnderthenigst ersuecht vnd gepeten worden Jne auf Bemelt oberst
priorat gnedigist zübestettigen vnd züconfirmiern Haben wir angesehen seine getreüe müye auch vleissige willige dienst so er vnd seine voreltern vnns vnsern vorfaren khünigen zü Behaim
offt vnd vnderthenigst gethan erzaigt vnd bewisen er vnd seine nachkhümen vnns vnsern erben vnd nachkhümbenden khünigen vnd der cron Behaim hinfüran wol thüen khünden sollen
vnd mügen Vnnd darumben alls Regieründer Behmischer khünig aus sonndern khünigclichen gnaden Rechter wissen wolbedechtig mit zeitigem vorgehabtem vnsers khünigreichs
Behaim Räte vnnd lieben getreüen rat merbemelten Zbinko Berken auf solh oberst priorat verwaltung possession vnd Jnnhabung desselben gnedigist bestetigt vnd confirmiert Bestettigen
vnnd confirmiern Jne auch aus Behemischer khünigclicher macht vnd gwalt hiemit wissentlich in crafft ditz brief Also vnd dergestalt das er volkhumbne macht haben soll vermüg vnnd
Jnnhalt der obgedachten gantzen ordens satzungen priuilegien Begnadungen stabilimenten statuten alle vnnd Jede sachen händl vnd fürfallende notdürfften wie das sein ambt aus=
weist züuertretten auszürichten vnnd züuerwalten auch zü der Eer lob vnnd preiß Gott des allmechtigen vnnd züerhaltung güetter ordnung vnd erhebung der ordens fürzünemen
wie vnserer vorfaren Römischer kaiser vnnd khünige loblicher vnnd milter gedechtnüß priuilegien vnd freyhaitten dem orden gegeben welche wir heernach auch genedigst Ratificiert be=
stetigt vnnd confirmiert solhes weitter aus sagen vnnd in sich sliessen Gepietten darauf allen vnd Jeden vnsern vnnderthanen Jetzigen vnnd khünfftigen vnnd lieben getreüen des
khünigreichs Behaim derselben Jncorporierten vnnd allen anndern obgenanten vnsern lannden was hohen oder nidern wirden stannds ambts oder wesens die sein hiemit ernstlich
vnd wellen das sy mergemelten Zbinko Berken alls öbersten maister obgedachts ordens vnnd den gantzen orden Bey diser vnnserer khünigclichen begnadung vnnd confirmierung
Rechten gerechtigkaitten Freyhaitten stabilimenten statuten güeten löblichen gebreüchen vnnd aufsatzungen gerüeblich verbleyben dero gen vnnd geniessen lassen darwider nit
thüen noch des Jemandten zethün gestatten sonnder vil mer von vnnsertwegen darbey schützem vnnd hanndthaben Alls lieb ainem Jeden sey vnser schwere straff vnnd vngnad zü=
uermeyden das maynen wir ernstlich Des zü vrkhundt Besiglt mit vnnserem khünigclichen Anhanngundem Jnnfsigl Geben auf vnnserem khünigclichem sloss prag den vierten
tag des Monats Octobris Nach cristi geburt fünfftzehenhundert vnd im fünffvnduiertzigisten Vnserer Reiche des Römischen im fünfftzehenden vnd der andern aller im Neüntzehenden /