Ich brudir Wenczlab von prage Comptur des hawses czu Glacz In der pfarre Ich bekenne vnd tue kunt mit desem
geygenwortigen briff allen den dy en zehen horen adir lezen das In meyne geygenwortikeit komen ist der frome
man lorencz waltman von frankenstein meyn wndirsasse vnd gebawer czu Tarnaw vnd hot vorkawft vorricht
vnd vorlangit eyne swere marg grosschen Ierliches zinses vir vnd sechczig grosschen vor dy marg czu reyten
vmme czehen swere mark grosschin off seyne halbe hube erbis czu Tarnaw das do gelegen ist bey Niclos heynckes
erbe czu neste czu Tarnaw den Iunngen hirn czu Glacz In der pfarre meynen brudern czur pietancie alle Ior czu
geben vnd zinsen eyne halbe marg off dy nesten weynachten czu kunftig vnd eyne halbe marg off sente Iohannes
tag des tewffers alle Ior Ierlich czu geben also czwey vnd dreyffig grossen vor dy halbe marg czu reyten vnd ab
der zins nicht gefile off dy egenanten zins tage off dem selben erbe adir wer das erbe her noch besiczen wirt
so sal der kuster der do noc is adir hernoch In czukunftigen czeiten werden mag genuk pfhandis helfen also ofte des
not gesicht vnd dy pfhand mag man vorsiczen vnd vorkewffen czu Cristen vnd czu Iuden an alle ofbytuge des
rechten vnd wen lorencz waltman adir seyne geerben adir nochkomelinge den zins wellen wedir abkewffe
mit czehen sweren marken grossen vir vnd sechczig grossen vor dy mark czu reiten das sal man en gunen dy widir
runge ist geschen In vnsirs Ordins hawse czu Glacz In kegenwortikeit hanns polans vnd hanns heyneman
wndirsasse czu Tarnaw vnd des czu orkunde vnd czu geczugen hab ich durch bethe willen lorencz waltmans meyn
Ingesegel an desen briff gehangen gegeben noch gotis gebort virczenhundirt Ior dor noch In dem Newn
czehenden Ior am freytage noch margarethe