Ich Haym von Hederinstorf und ich Elsper sein hausvrowe hern Awolfes tochter von purchhartesdorf
verchen und tuen chunt Allen den die disen brief lesent oder hörent lesen daz wir und unser Erben
unvnschaidenleich und Auch mit gesampt hant ledich und vrei haben lazzen hern weycharten peiden
ainnern brüdr ze den zeiten hofmaistr unser vrowen der herzoginn und sein hausvrowen vrow klareyn
und alle ir Erben Alles des chriegs und alles der Ansprüch der wir oder unser Erben gegen im und
gegen Allen seinen Erben gehabt haben oder noch gewinenn mochten umb daz purchrecht daz gelegen ist
zwischen töblich und der heyligenstat und haizzet in dem hard und umb daz guet ze vöelndorf daz wir
noch unser Erben furbaz dhain Ansprach noch dhainen chrieg gegen hern weycharten noch gegen seine
Erben haben sullen und durch pezzer sicherhait so geben wir im disen brief zu ainem offen urchund und
zu ainem waren gezeug der sache isigelt mit unserm Insigel und mit des Erbarn Ritter Insigel
hern hainreichs von Rüpach der diser sache gezeug ist mit seinem Insigel der brief ist geben
ze wienn do man zalt von christes gepurd dreutzehen hundert Iar in dem dreivnd dreizzigistem
Iar darnach An dem nachsten dinstag vor sand Gertrauten tag : -