Ich Hainreich der Chrotenstainer vnd all mein erben wir tůchen vnd tůn chunt allen die disen prief lesent oder horent
lesen die nů lebent vnd hernach chůnftich seint daz wir mit bedachtem můt mit gesampt hant mit vnser pesten freun
de rat vnd mit all vnser erben gůtlichen willen zů den zeiten da wir ez wol getůn mochten haben zů chaufen geben vn
sern swager Chůnrat von Hochenberch vnd sein erben an dreytzehen phenning vierthalb phunt geltes wiener phenning
vnd achtzehenhalbe emmer perchrehtes des ist ain phunt geltes vnser rehtes eyge vnd leit auf zwaim halben lehen
daz man Petzpach vnd an dreytzehen phennig drithalb phunt phennig geltes vnser rehten purchrehtes die ligent auf
weingarten auch dacz nider Petzpach vnd die achtzehenhalbe emmer perchrehtes auch vnser rehten purchrehtes die auch
ligent da selbs zů nider Petzpach die nůn mit sampt den egenanten an dreytzehen phennig drithalb phunt geltes zů
rehtem purchreht haben gehabt von dem edlen herren her Nyclasen von Meyssaw vnd dient mit einander iars
vnd iarlichs wiener phennig auf sand Mychels tag daz hab wir in alles geben den vorgenanten Chůnrate vnd
sein erben vmb fůnf vnd viertzik phunt wiener phennig der wir gentzlich vnd gar bericht sein vnd gewert vnd ob
dem egenanten Chůnrate von Hochenberch vnd sein erben an dem ersten phunt geltes daz eygen ist vnd leit auf zwaim
halben lehen icht abgieng daz schullent sie haben auf vnsern hofen dacz Petzpach da wir selb auf siczen vnd auf all
der zins der zů gehort daz setz wir in zů ebentewr vnd zů ainer vesten sicherhait vnd ich egenanter Hain
reich der Chrotenstainer vnd mein erben wir luben dem vorgenanten Chůnrate vnd seinen erben fůr die an dreytzehen
phennig drithalb phunt geltes vnd vmb die achtzehenhalbe emmer perchrehtes vesten schirm fůr all ansprach als
purchrehtes reht ist vnd landes reht ist in Osterreich vnd ob sie des dehain schaden nemen mit reht den sie beweise
mogen den schull wir in abtragen oder wir moht schullent sie ez haben auf vns vnd auf alles vnser gůt vnd
auf all vnser erben gůt daz wir haben in dem lande zů Osterreich vnd daz in die red stet vnd vnzerbrochen bleib dar
vber geb wir in disen prief zů ainem offen vrchůnd versigelt mit meim Ingesigel der sache sint gezeuch her Perhtolt
der Vissinger vnd Ians der Mei mit iren Ingesigeln der prief ist geben nach chrysti gepůrt dreytzehenhundert iar dar
nach in dem Nievn vnd dreytzigsten Iare an sand Marteins tag des heiligen Pyschofs