Ich Alber von Haimuerch vnd mein Hausfrov frav Margret. veriehen vnd tůn chunt an disem prief allen
den di in sehent oder horent lesent Daz wir vnsers anderstochen aigens daz vns ledig warden ist von hern
Otten dem Hager zeden ceiten pharrer ze chrupench ein guet daz genant ze prantgraben ist haben
verchavft ze alle dem nucz vnd da ze gehoert ez sei versucht oder vnversucht oder wie ez genant sei dem
erbern chnechte Tanchwarten von. Cweinar. vnd seiner Hausfrovn fravn Annen vnd allen iren
erben ez sein sun oder tochter vm achcehen phunt Wienner phennig Der wir gancz vnd gar gewert
sein Des vorgenanten sacz losung sol alle iar sein an sand Geirgen tag So schul wir in die
vorgenanten phennig geben on abslag Tůt wir aver des nicht so schulen sev allen iren frum da
mit schaffen mit verchavffen mit verseczen vnd geben swem sev wellen an allen vrsal Vnd nemen
sev dar vber dhain schaden mit recht den selben schaden schulen sev haben auf alle dem gůt daz wir
haben in Osterreich Ich vorgenant Alber von Haimuerch vnd mein Hausfrov frav Margret wir
seczen vns dem egenanten Tanchwarten vnd frav Annen seiner Hausfrovn Vnd allen iren erben
geschevem vnd ze gevrn als des landes recht ist vnd gewonhait in Osterreich Vnd daz daz alles stet
vnd vngebrochen beleib gib ich vorgenanter Alber von Haimuerch dem egenanten Tanchwarten vnd
seiner Hausfrovn frav Annen vnd iren erben disen prief besigelt meinem insigl. vnd mit meines
vetern. Vlreichs insigel von Haimuerch vnd mit hern Vlreichs Insigl von Eppendorf die der
sache gezevg sind. Der prief ist gegeben da man zalt von christes gepurt drevzehen hvndert
Iar dar nach in dem zwai vnd vierczigisten Iar an sant Cholmans tag .~.~.