Ich Gundacher der werder vnd mein erbn wier viechen offenlaich mit dem prief allen leuten daz wier
verchauft haben vnsers rechten aigens an vier ein halb phunt gelts wiener phenning der selbn gult leit
ein schaffing ainer vnd sibenzigich phenning gelts auf behaustem guet vnd funf vnd vierzgich phen
ning gelts pei Ebersperig auf der haid vnd auf ackern vnd wo si do pei ligent Die gult haben
wier verchauft vnd geben mit allem dem nucz vnd rechten als wiers in aigens gewer her pracht habn
hern Gotsriden dem sebechen vnd seinen erben vmb sechzgich vnd vmb sechs phunt phenning wiener
munz Der wier gewert sein gancz vnd gar si schullen auch die selbn gult in nucz vn(d) in gwer
habn vnd allen irn frum do mit schaffen mit verchaufen mit verseczen vnd geben wem seu wellen
vnd pin auch ich vorgenanter Gundach(er) vnd mein erben der vorgenanten gult hern Gotsride des
sebechen vnd seinen erbn recht gwer vnd schirm fur all anspruch als aigens recht ist vnd des
landes recht ze osterreich Wer aber daz seu an der vorgenante gult dhainen chrieg od(er) anspruch
gewunne mit recht den schullen wier in aucz richten vnd ab legen gancz vnd gar daz loben
wier in gelaisten mit vnsern treun vnd schullen auch seu daz haben auf vns vnd auf allem vnserm
guet daz wier haben in dem lant ze osterreich wier sein lebendich oder tod vnd geben in dar vber
den prief versigelt mit vnserm Insgel vnd sind zeug hier an Ott von polanchenstain vn(d) perichtolt
der Eberspergmaer mit irn Insgeln Der prief ist gebn noch christes gepurd dreiczehen hund
ert Iar dar noch in dem vier vnd viergkyten Iar an sand Egidien tage