Ich Wenczla vnd ich Pärreline hern Chunrates sune des Hwischenprunner hern Engelprechtes bruder des panken an dem Härmarkt
ze wienne den payden Got genade wir veriehen vnd tůn chunt allen den die disen brief lesent oder hörent lesen die nu lebent
vnd hernach chünftich sinde daz wir mit vnser Erben gůten willen vnd gunst mit verdachtem müt vnd nach vnser pesten freunt
rat zü der zeit do wir iz wol getůn mochten Vnd mit vnsers lehenherren hant des edeln hochgeporn fürsten herzoge Albrechtes
ze Osterreich ze Steyr vnd ze Chärnden Verchauft haben vnsere rechten lehens daz wir von im ze lehen gehabt haben
Des ersten Allen vnsern Zehent den wir gehabt haben ze Nydern loh Grozzen vnd Chlainer ze velde vnd ze dorffe
es sey gestift oder vngestift versücht oder vnversücht swie so daz genant ist da engegen der pfarrer sänte
Stephan ze wienne den andern tayl hat Vnd allen vnsern Zehent den wir gehabt haben ze lantzendorf auf vierd
halbem lehen Auch Grozzen vnd Chlainer ze velde vnd ze dorffe es sy gestift oder vngestift versücht oder vnver
sücht swie so daz genant ist Vnd da engegen der pfarrer sänte Stephan ze wienne auch den andern tayl hat
Vnd sinde auch vns die selben zwen Zehent mit fůrtzuch vnd mit loz ze recht em Erbteil an geuallen Gegen
vnsern drin swestern Agneten Chlärn vnd Kätrem do wir mit ain ander getäylt haben den da engegen ander erbteil
geuallen ist da mit si von den selben zwain Zehent getailt sinde Die selben zwen Zehent haben wir recht vnd red
leich verchauft vnd geben mit alle dem nutz vnd recht als wir si in lehens steuer her pracht haben Vmb Neun
czich pfunt wienner pfenninge der wir gar vnd gäntzleich gewert sein Dem erbern Gůten hern Weygharten pey
den Jnnern průdern ze wienne vnd seinen Erben fůrbas ledichleichen vnd vreyleichen ze haben vnd allen irn
frumen da mit ze schaffen verchäuffen versetzen vnd geben swem si wellen an allen widerfal Vnd sein auch wir
ich vorgenanter Wenczla vnd ich Pärreline sein pruder vnd vnser Erben vnueschaidenleich der egendnten Zwäyr
Zehent als eze verschriben ist des vorgenanten hern Weygharten vnd seiner erben Gecht gewer vnd scherm fůr
alle ansprach als lehens recht ist vnd des landes recht ze Osterreich Wär aber daz si an den selben zwain
Zehent icht chrieges oder ansprach gewunnen oder daz in dar an icht ab gienge des si mit recht schadhaft wurden
von swem daz wäri swaz si des schaden nement daz suln wir in alles aus richten vnd wider cheren an alle ir müt vnd
an allen irn schaden Vnd suln auch si daz haben auf vns vnueschaidenleich vnd auf allem vnserm gůt daz wir habe
in dem lande ze Osterreich wir sein lebentich oder tode Vnd daz diser chäuf fůrbas also stät vnd vnzerbrochen
beleibe dar vber so geben wir in disen brief zü einem gůten stätigem vrchunde diser sache versigelten mit
vnsern Jnsigeln vnd mit des erbern Gůten Jnsigil hern leymprechtes dez Zäunruden zü den zeiten purger
maister ze wienne vnd mit hern leupolts Jnsigil des Hirnprechen vnd mit hern Hansen Jnsigil in dem ströhof
die da gůt zwischen vns geswisterayden Getäylt habent vnd die vns auch aus dem Gůt ze täylern zegeben wur
den vnd mit vnsers vettern Jnsigil hern Růgers dez Meingren hern leupolts sun die wir des gepeten haben
daz si iren Jnsigil zü einem gezeuge an disen brief gehangen habent Diser brief ist geben ze wienne nach
Christes Gebürde dreuzehen hundert iar dar nach in dem secht vnd viertzigisten iar an sänte Andres tage