Ich Ott der Walder vnd mein erben wir vergehen vnd tůn chunt Allen den die den brief lesent oder horent lesen die nu lebent vnd hernach chůnftich
werdent Daz ich mit meiner erben gůtem willen vnd gunst mit wolbedachtem můt zů der czeit do wir es mit recht wol getůn mochten Durch
freuntschafft vnd durch lieb willen chauft vnd vellich gegeben han Conratz chreczel purger ze der stat ze ~Salczpurg~ des gůt lehen
sind ze aiden wisen ze sandent anelise vnd ein schant wein pfenning vnd daz die puczinger von mir ze lehen gehabt habent Die selben
aygenschafft han ich geben Hensen dem ~Hebelcher~ von ~Hebelch~ vnd ~Chůnrat~ ~Peyrner~ seiner hausfrawen vnd irn erben Allen den nuczen vnd
rechten als ich es an aigen gůt her pracht han hin ze lehen ze lassen vnd ze verlasen ze erben vnd alles irn frumen da mit ze schaffen ver
chawffen verseczen vnd geben wem si wellent In aller massen vnd bin auch des vergewisset Ott der Walder vnd mein erben vnuerseczt
verlassen der vorgenanten aygenschafft des egnanten Hensen des ~Hebelcher~ vnd ~Chůnrat~ ~Peyrner~ seiner hausfrawen vnd ir erben recht gewer
vnd schirm fur alle ansprech als aigens recht ist vnd des landes recht maister aist Tůt aber auch daz si fur daz daz in mit recht oder
chrieg dar auff gewunnen daz ez in der in der aigung mit recht swer si des schaden nement den schullen wir in alles ausrichten vnd wider
chern gancz vnd gar an allen irn schaden vnd schullen auch si daz haben auf vns vnuerhindert vnd auf alle vnser gůt die wir habent wů
sin lebentich oder tod daz lobn wir alles ze halten mit vnsern trewn an alles geuerde Vnd gebn in dar vber den brief zů ainem vrkunt schaften
verchunt vnd zů ainer ewigen vestnunge der sach versigilt mit meinem Insigil vnd mit ~Chůnratz~ Insigil des ~frewntschafft~ zů den czeiten
purchgraff vnd richter ze ~Salczpurg~ vnd mit ~Wolfgang~ Insigil des ~Walder~ zů den czeiten gesessen an dem ~Aidenperig~ die der sach
geczewg sind mit irn Insigeln an den selben den brief ist geben Nach ~Christs~ geburde drewczehen hundert Iar Dar nach in dem
vier vnd sechczigisten Iar an vnser frawen abent ze der liechtmisse