Ich Jörg Daczylawer vnd all mein erbn dieten offenlich an dem prief alln leuten di nu lebn od(er) her nach chufftig w(er)dn daz wir
mit wol pedachtem mut vnd mit gunst vnd mit willn vnser(er) erbn zu d(er) zeit da wir is wol tun mochten mit recht recht vnd re
dleich v(er)chauft habn vnser rechten aign ein tagwerch wismad gelegen vor d(er) aw vnd ein and(er)s wis di genant ist d(er) gartn da
mein tailt gut ist gegen meim prüd(er) Hansen dem meyläner daz vor genant wismad mit all(er) deis vnd dar zu gehort hab
wir recht vnd redleich v(er)chauft vnd gebn Wlreichn dem Sebestyn vnd sein erbn vmb dreizzich vnd vier pfunt pfennig wienn(er)
muncze furwas ledleich vnd freileich ze habn vnd alln irnn frum da mit schaffen v(er)chäuffen od(er) seczen gebn wem si welln
an alln chrieg vnd irrsal wir sein aüch des vor genant wismadz ir recht(er) geib vnd schirm fur all ansprach alls aigns recht
ist vnd des landes gewonhait in ost(er)reich wer an den si chrieg od(er) anspruch gewunnen von vnser(er) od(er) wer(er) wer si dann des schädn
nemen mit recht daz schull wir in alls auz richten vnd richtich machn an all ir mue vnd schädn tet wir des nicht so schulln
si haupgut vnd schädn habn auf vns vnd auf allm dem gut daz wir habn in dem lant ze Osterreich is sei enbgut od(er) farnns
gut vnd schulln sein da von pechomen ein flywot vnd an chlag wie in daz all(er) pest fugt mit vns(er)m guetleichen willn wir sein
samptig od(er) tod daz in daz stet vnd vnczeprochn pleib dar vmb gib ich in ich vor genant Jeorg Daczylawer den pief ver
sigelt mit meim anhangendn Infigel. d(er) sach ist geug Vlreich d(er) sielman Hann von stäinreichs p(er)g mit seim an
hangendn Infigel. Der prief ist gebn nach christi gepurd dreuczehn hund(er)t Jär dar nach in dem sechs vnd sybencz
gistem Jar des mitichns vor dem palmtag