Bernhard brůnig Czeßanthichter Innamen der Stad Colyperg Vnnd von
meiner gesworen Andres Schuman peter hoffman Jorg kuncz merten
Lobestang bernhard hempstil fabian drobenaw Michel schilher Gesworene
Scheppen daselbst bekenne das vor vnns In gehegtem dinge der vor
sichtige Cipping phingner bekenne das her off eyne widerkouff recht
Vnnd redelich vorkoufft habe Eynne halbemarg gelds Jerlichs zinses vmb
Sechs gute vngerische gulden In vnd vff seyne hoffe bey Christoff
Jingeling vnd Czesthinn hans gossen schucz gelegen dem wirdigen hern
Johan sadeler vnnserm Comptor vnnd seyne brüder Gehorinde In
die brüderschafft der penitencier Zugleuch die Jczund seyn vnd her
nochmols werden vnnd Gelobite sulchen zinße gutlich zürichten
vnd geben vff wietefaste nehst vorgange anczuheben Ap das nicht
geschege So sal der brüder In der czeit den obgemelte brü vnd brüderschafft
die Jczunt sin vnd hernochmals werden phandis gungczan In dem
gedachtem hause vnd hoffe vnnd alle seyne farende vnd vnfarende
habe In brüderacht begreiffen vorhelffen lassen durch ordennige Ane
vffbietunge sich dorober uffolgen hetten Vnnd wen Cipping phingner
seyne Erbin vnd nehisten sulchen obgemelte zins widerkouffen
wollen vmb Sechs gute vngerische guld sampt den vorseßin zinsen
durch Quatuortemp zal wlouffen Sal Im der widerkouff gutlich vor
gunst vnnd ane widerrede gestatt werden In vrkund Geben den
nehsten donerstag noch Quasimodo geniti Anno Salutis M° ccccc° secundo