Fabia(n) stobner gesatzt richter Jnnams der stat goltcz Cristoff langener
martel stobner francze baldena(n) engel mitscher paul augst Simon
steinbach vnd Jarge heinrich Bekenne(n) das vor vns Jngesichte dynges
Valten kranig Bekante das er eine marg Jerlichs czynses vmb czeen
marg ganghafftiger muncze den brudern vffem pfarrhoff czu Jwan
piadawcz recht vnd redlichen vff ein widerkauff vff sein forwerg
czunigst hans wenczeln vnd agats schubarts gelege(n) Jn der nider
awge vorkaufft hette globte Jne sulchen czynsz auff anctoni
nechstkunfftig anczuheben gutlich czugeben vnd also furbas mehr
alle Jar Jerlichen Vnd ab das nicht geschege so sal der richter
die czeit gemelten brudern iczigen vnd czukunfftige(n) czu ge
melctem forwerge pfandes gnugsam vorgreiffen lassen
die pfand vorsiczen ader vorkauffen vor den vorseßne(n) czynns
sun alle recht ane vffhaltunge domit dinglich begang(en) seyn
were Vnnd wenn Valten kranig ader besiczer des forwergs
sulchen czynns wollen widerlosenn vnd kauffen das solle(n)
sie macht haben mit x marg ganghafftiger g(e)muntze
mit mitsamptunge vorseßne(n) czyns nach quartal czeit
ablauffen sal Jnen gegunt werden actu(m) dornstag Nach
Cinerum a(nn)o (etc) Jn xxv Jare(n)