Wir Burgermaister Vnd Rathmanne der
Stad Goldberg Thün künd vnd bekennen hiemit offentlich vor vns
vnd vnsere Nachkommende Das nachfolgende Signatur wie Sie von Wortt zu Wortt lauttet in vnsern gemeinen Stadbüchern ein
geschrieben zu befinden. Heut dato am Tage Martini war der Eilffte Nouembris des Tausent Sechs Hundert vnd Vierden Jahres seind
für vns allhier vor einem Erbarn Rathe Richter vnd Schöppen gestanden eine gantze Ersame Zeche des Handwercks der Becker mit Namen
Martin Scholtz Mattes Zobel Hans Thomas Dauid Müller George Herman Mattes Wittwer Caspar Sommer Heyde Melchior Sommer Martin
Junge Hans Han Hans Feige George Reiche Georg Mesnertt Dauid Moller George Wentzel Paul Mesnertt Dauid Klose Tobias Tschirmer
Paul Niel Martin Wittwer Fabian Sunman Cristoff Qwitze Cristoff Beer Hans Kniser Caspar Szimann Caspar Nixdorff Cristoff Riedel
Caspar Scholtz Dauid Müller junior Wittfrawen seind: Die Hanß Hermanin die Eltere Hans Hermanin die Jüngere Vnd haben für sich ihre Erben Erb
nehmer vnd rechte Nachkomen freywillig bekennet vnd außgesaget Nach deme Sie von dem Wolwirdig Edlen vnd Gestreng Herren Felician von Mosch vnd
Moritz D. Johannis Hierosolimitaner Ordens Ritter Commendator zu Glatz Goldberg Camentz Fürstenfeldt vnd altes Brün Rom: Kay: Maytt: Raht vnd des Kön: Schloß Prag
Hauptman fünff Brodbancke so seiner Commenden allhier eigenthümblich zugehörig in einem rechten Erbkauff vmb ein Tausent Taler Jeden derselben pro Zwey hun
dert Taler gerechnet an sich bracht Solche Summa abermals balde bezahlet Sondern auff wieder Käufflich Zuleslich Zinsen nemblich
Fünff Taler Vom Hundert vnd also Jehrlich vmb Sechtzig Taler denselben allwege so lange es Ihnen solche Tausend Taler wircklich mit abzulag Vnd sich von solchem
Zinse zu befreyen gefallen würde auff Martini von Heut vber ein Jahr nemblich mit bezahlung solcher Sechtzig Taler Zins anfahen vnd entrichten erbig vnd
behalten solten vnd wolten Hingegegen Sie den anfangenden solchen Tausent Taler vnd Jehrlich Sechtzig Taler Zinsen halber nicht allein die bereite erkauffte Sondern auch
alle andere Ihre Brodbancke welche Sie allhier bey Sammen Vnd erblich besitzet Vor sich Ihre Erben vnd nachkommende Besitzer solcher Ihrer Brodbancke Wolgemeltem Herrn
Commendatorn Von Mosch Vnd alle seinen Nachkommenden Commendatorn zu spezieller Vnderpfande zu zeugen rechter waren Gewißlich Vnterpfande solcher gestalt
eingesetzt vnd verpfendet hetten Vnd hiemit versetzen vnd einsetzen. Also nemblich alle dieselbigen Brodbancke Wolgemelten Herren Commendator vnd alle seinen
Nachkommenden Commendatorn allhier zu einem rechten Gewissen wahren Vnterpfande stehen vnd hafften so vnd da selbes auch auff allen fall der mit zahlung abermal
der Jehrlich Sechtzig Taler Zinsen hetten fug Recht vnd macht haben sollen sich an alle solche Brodbancke zu halten die Gerichtlich Helffte darinnen zu begeren
vnd sich darinn in Rechten erlittenen Schaden vnd Vnkosten schadlos zu machen Dagegen sich der Herr Commendator erbotten einen gnedig Consens vnd Ratification
des Hochlöblich Ritterlich Ordens hierüber außzubringen Vnd Ihnen den Herren Vorweisung ein zu antwortten Welches dan auch Dato gleich wie diß gesche
hen. Vnd baten derowegen die bemelte gantze Handwercks Zeche der Becker vns einen Erbarn Rathe Richter vnd Schöppen das wir alß die ordentliche
Obrigkeit vber Sie vnd bemelte ihre Brodbancke vnsere einwilligung vnd zulassung thun wolten Darauff Wir angesehen Ihre Zimbliche bitte vnd in be
trachtung das solcher Abhandelter Kauff vnd Verpfendung Ihnen Ihre Erben vnd Nachkommen zu nutz vnd fromen gereicht Vnd haben von Amptswegen hierzu Consenti
ret vnd mehrgemelte Verpfendung wircklich zugelassen vnd bestettiget Thun solches auch hiemit wissentlich mit der Expressen bedingung dem Herren Commen
datorj vnd seinen nachkommenden Commendatorn So wol dem Hochlöblich Ritt: Orden Daß auff den fall offtbemelte Hiesige Erbare Zunfft der becker künff
tiger Zeitt Ewan Je immer Vber oder bißhero mochte mit bezahlung offtmehrgedachter Jehrlich Sechtzig Taler Zinsen seumig werden das wir nicht dem Herrn
Commendatoris der Nachkommenden vnd obgemeltes Hochlöblichen Ordens begehren zu aller vnd Jeder Zeit die Gerichtliche Hülff in Vielbemelte Brodbancke
thun vnd ihnen deßen verhelffen wollen vnd wellen damitte Sie so lange so viel bemelte Brodbancke der offtgedachte Tausend Taler Kauff Summa bey
sich vmb solch wieder käufflich zu behalten werden denselben allweg zu rechter Zeitt Vnd in Vnuerschener Verzugerung sampt erlittenen Schaden vnd
Vnkosten trewlich erlang vnd Gehalt ohn alle gefehrde richtig vnd trewlich bezahlet werden mögen Alles gantz trewlich vnd vngefehrlich. Dessen zu
Warer Vrkund Haben Wir diß alles so offtes in vnsern Gemeinen Stad Büchern ein Verleiben lassen Vnd der Becker auch zu begeren vns bitten diese
glaubwirdige Recognitien geben. Geschehen zu Goldberg den 20. Tag Februarij Im Tausent Sechs Hundert vnd Sechßten Jahre