Wir brudir heynrich von Newinhuse meister vnd prior des ordins Sente Johannis von Jherusalem czu Behemen
polan Ostirreich etc(etera) Bekenne in disem brieffe allin den di en sehin horen adir lesin das Brudir Andreas Comptor
vnsis hawssis czu Lewinberg vor vns bracht hat in eyn gemeyne Capittil wi ffrawe Gele Trebilschiczinne der got
gnade vnsir meteswestir lange gewest ist vnd hat an yrem totbette gedacht an di gnade des heiligin Ordins
vnd irre sele selikeit dorynne gemeynet hat bescheidin vnd gegebin an eyme ewigin zele gerete czw mark
Jerlichs czinse vnsirn brudrin czu Lewinberg an irre pietancien das di egenanten brudir czu troste vnd czu eyme
seligin gedechtnisse irre zele sullin si alle iar in den fir quatuortemp(er) vier bigilien mit ix leccion vnd also
fil messin singin vnd haldin sullin vnd er ierliche czit also selbist haldin des habe wir der egenantin ffrawin
Gelen ynnige begerunge vnd guten willin den si czu vnsirm Ordin gehabit hat angesihin vnd gebitin dem
Comptor mit sinen Brudrin des hawssis czu Lewinberg di itczunt syn adir her noch molie czu kumphtik
werdin by rechtir gehorsam vnd wellin das gehabit han vnd also bestalt habin das di egenantin brudir
der egenanten ffrawen Gelen di bigilien vnd di messin haldin vnd singin alz obin geschrebin stet vnd off wilche
quatuortemp(er) adir yerige czit vnsir Brudir des hawssis czu Lewinb(er)g nicht hildin so sullen der egenantin ffrawen
Gelen nestin frunde di das zele gerete gegont vnd yrin willen dorczu gegebin habin adir wer den brieff hat
mit deme brieffe sullen sy den pyetancien meister der itczunt ist adir her noch czukumphtik wirt manen vm(b)
eynen firdung grosschin des sal her auch vorvallin syn der firdung sal man armen lewtin gebin vnd das alle
dise dink gancz stete vnd vnbrobrochlich gehaldin werdin des habe vnsir Ingesigil an gehangin an disin briff
ineyme gemeynen Capittil das wir habin gehaldin czu der Zutelw Noch gots gebort Tusint Jar firhund(er)t
iar dornoch in dem firdin iar am Sontage an sente matheis tag des cwelffbotin vnd ewngelistan