Wir frantze vom Hage von kuniglicher mechte zu Behmen houptman der ffurstenthumen Sweidnitz vnd Jawer Bekennen offenlichen mit desem briffe
allen die en sehen horen adir lesen das vor vns komen ist der Erbar woltuchtige heyntze Tawssendorff gesunde leibs vnd gutt vornuft vnd hot mit wolvordach
dochtem mutte recht vnd redlichen zu einem leipgedinge als leipgedings recht ist gegeben vorreicht vnd offgelossen der Togutsamen ffrawen hedwigen seiner
elichen hawsfrawen Czwelff hungersche gulden ierlicher zinse vff allem das her hot In vnd vff dem Gutte vnd dorffe zu plackwitz im weichbilde
zu lemberg gelegen woran adir welchinswe das alles gesein mochte vil adir wenig cleine adir gross keyns aufgenomen Zugeben vnd bazalen dieselben
zinse alle ior ierlichen halb vff sandt walpurgis vnd halb vff sandt Michaelis tage vngehindirt Ob das nicht geschee so sal vnd mag die obgenante
ffrawe hedwigis adir wehme se das von eren wegen zuthun beuelen wurde vmb ire vorfessne zinse pfenden mit hulffe des hoferichtes zu lemberg In
vnd vff dem obgeschrebn heyntze Tawssendorffs ires elichen mannes Gutte vnd dorffe zu plackwitz vnd vff allen vnd itzlichen seinen zugehorungen nichts
aufgenomen als offt vnd dicke ir das notdorfft sein wirt mit denselben pfanden se ouch thun mag gleicher weisse als ab alle raht domete begangen wern
Och hot die obgenante ffrawe hedwigis zu vormunden gekorn den woltuchtigen hannos Schindeln von lawtirbach ir dese gobe vnd leipgedinge zubeschutzen
vnd beschirmen vnd als getruwer vormunden recht ist zu vorwesen Czu sulcher gobe vorreichunge vnd offlossunge haben wir von kuniglicher gewalt vnsern
willen vnd gunst gegeben vnd haben der abgemelten ffrawen hedwigen des gemelten heyntze Tawssendorffs elichen hawsfrawen die genan Czwelff hungersche
gulden ierlicher zinse In vnd vff dem abgenan Gutte vnd dorffe zu plackwitz vnd vff allen vnd itzlichen seinen zugehorungen keyns aufgenomen In aller
mosse vnd meynuge vnd meynuge als oben geschreben steeth gelehn vnd gelangt leihen vnd langen gemachsam vnd vngehindirt Czu haben zu geniessen zu
gebrauchen vnd als leipgedings recht ist zubesitzen vnsers hern kunigs lehn vnd rechten vnschedlich mit vrkund dis briffs vorsegilt mit des abgenan
vnsers hern kunigs anhangenden Insigil des wir von seinenwegen als eyn houptman In den abgenan ffurstenthumen obir lehn vnd sachen gebru
chen Bescheen vnd geben zu Sweidnitz noch cristi geburt viertzehnhundirt dornoch Im Eynvndsebetzigisten ioren In den feirtagen der heilgen ostirlichen
zeit Dobey seint gewest die woltuchtigen hannos Schindel von lawtirbach obgenant Cristoff korbitz vnd der namhafftige Cristoff Schoff vom hinasst
Canzeler vnd hoffemeister zu Sweidnitz der desen briff gehabtt hot In beuelnuge