Wir Kasimir vonn Gotsgnodenn Hertzog Im Slesienn Teschenn vnnde Grosz
glogaw von koniglicher Macht In beheimenn heuptman der ffurstentumbenn
Groednitz vnde Iawor Bekennen offentlichin mit disem briffe vor allen die ehn sehn
horin ader lesin das vor vns komin ist der Wollenchtige wenczetz tawsfendorff gesunde(r)
liebes vnnde gutter vornufft vnde hot mit wolbedochtem mutte vff eynen widderkauff
von seynitwegen vnde in macht seyner bruder recht vnde redlich vorkaufft vorreicht
vnde In vnszer hende williglichen vffgelossenn: dem vorsichtigin Nicoll Hosznern
vnde Nicoll fritschnirn mitburgern czw Llewmberg Irin Erben vnde rechtnach
komin eyn stucke acker byn plackewitz gehorende am bober Im weichbilde czw
Llewmberg gelegin mit aller vnde Ieglicher Czwgehorunge woran vnde welchirley
das sey vnnde heissin mochte gansz klein vill vnde winig benant vnde vnbenant nich
tes awsgenomin das Czuhaben mit allen solgen rechten notczen genissen hirschaff
ten fruchtbarkeiten vnde gerichtikeiten In allirmosze vnde weise als das der ge
nantte wenczetz tawsfendorff vnnde seine bruder selbist In besitzunge gehabit habin
ginossen vnde besessinn ant dach sollgem vndirscheide das der egnante wenczetz
tawsfendorff vnnde seyne brudere Ire Erbin vnnde rechtnachkomin das vorge
melte stucke acker mit aller vnnde Ieglicher Czwgehorunge widderkauffen moginn
Vmbe tzwentzig gutte vngrische gulden wenne sie wollin vngehindert vnde dye
abelosunge sall gescheen: tzwuschenn bartholomej vnde martini Czw sollgem kauf
fe vorreichtunge vnnde vfflossunge haben wir von koniglicher macht In beheimenn
Ionszern willen vnnde gunst gegebinn vnnde haben den obgnanten Nicoll fritschnir
vnnde Nicoll Hosznern Irin Erbin vnde rechtnachkomin das obgeschribinne stucke
acker byn plackewitz gehorende am bober Im weichbilde czw Llewmberg gelegenn
mit allen rechten vnde hirschafften vnde mit aller vnd Ieglicher Czwgehorunge
woran vnde welchirley das sey nichtes awsgenomin In allirmoszin vnde meynung
als obingeschriben stehet Gelehn vnnde gelanget lehin vnde langen gemachsz
vnde vnsz hindert Czuhaben czubesitzenn czugenissen czugebrauchen czuvorkauffinn
czuvorsetzenn vor tzwentzig gutte vngrische gulden vnde den obgnantten wenczetz
tawsfendorff seyne brudere Ire Erbin vnnde rechtnachkome an den widderkauff
czuweysenn vnnszers hern koniges lehn vnde rechten vnschedlich ant orkunde
disz briffes vorsigelt mit obgnanttin vnnszers hern koniges anhangenden Ingesigell
des wir von seynen wegen als eyn heuptman In den obgemellten ffurstentumbinn
obir lehn vnnde sachen gebrauchin Gescheen czw Llewmberg vnde Gegeben czw Groed
nitz Noch Cristi geburt virtzehnhundert dornoch Im tzwocvnndneuntzigistinn
Iore: Den Sontag noch francisci: Do bey sindt gewest dye Erbare wollenchtige Berf
fridt tawsfendorff: Guntzell tawsfendorff Nicoll bosz vnde der wollnamhaffttige
Irenigt Schoff von kynast kanczller czur Groednitz der diszenn briff gehafft hot
Im befelhnsse: