WIr Conradt vonn Dobrgoß Rytter Hauptman der furstenthumb Schweidnitz vnnde Jawer. Bekennen offentlich mit dyßem brieffe vor allenn dy ehn sehen horen ader leßenn,
das vor vns komen ist der Erbar Ditze Rawßendorff vonn plagkewitz gesunder leybes vnde gutter vornunfft vnde hat mit wolbe
dachtem mute Nach seinem tode frey vnde ledigk gegeben Zu einem testament vorerugt vnnde hin vnsere hende willigklichen
vffgelassen: Nemlichen der mutter gotes, der heyligenn frawen sandt Anna vnnde dem heyligenn francisko Zu lewemberg vnnde
denselben gestifftenn vorweserenn pflegerenn vnde Zukunfftigen Alles das er hat vnnder vnserm herrn konige Zu plagkewitz
Im weychbilde Zu lewembergk gelegenn Es sy an freyheyt gebawenn gartenn wiesenn wassern lennenn Zcinsenn In
pfenniges vnnde getreydepachte woran vnnde welchereley das sey groß klein vill vnde wenig krant vnde vnkrant nichtes
ausgenomen, Zohabenn mit allenn solichen Rechtenn nutzen genyssen herrschafftenn freyheykaitenn vnde gerechtigkaitenn
In allermasse vnnde weysse wys er das selbe gehabtt vnde besessenn hat, doch mit dyßem vnderscheyde Wo nach tode des
gnanten Ditze rawßendorff ymant seynes gut von erbfalles ader sich anderweys Zuthun wolt, derselbig mag ys von denn
vorweserenn des obgemeltenn gestiffts Zu sich loßenn vmbe Achtzigk schogk Behmischer grosschenn, wenn er will vngehindert
Oder so behelt ehn gnanter Ditze Rawßendorff bynnen seyne vollemacht vnde freyenn willen mit dem vgemeltenn
gutte Zuthun vnde Zolassenn wy yhm wolgefelt allersachen vngehindert Zu sulcher gabe vorwilligunge
vnnde vfflassunge Habenn wir vonn koniglicher macht Zu Behmen vnserm gnedigenn herrn gunst gegeben, vnde habenn
dem obgemeltenn gestiffte der mutter gotes, der heyligenn fraw sandt Anna vnnde dem heyligenn francisko Zu lewemberg
vnnde denselbigen gestifftenn vorweserenn pflegern vnde Zukunfftigenn Alles das so der gnanter Ditze Rawßendorff hat
vnnder vnserm herrn konige Zu plagkewitz Im weychbilde Zu lewemberg gelegenn Nemlich nach seinem tode
mit allenn rechtenn herrschafftenn vnde gerechtigkaytenn nichts außgenomen In allermasse meynunge vnde vnderscheyde
als obingeschriebenn stehet Zu einem rechten testament Belehenn vnnde gelayget, leyhenn vnnde laygen gewaltsam
leynde vngehindert Zohabenn Zugenyssen Zogebrauchenn Zubesyzen vnnde In masse obbenennet vmbe Achtzig schogk
Behmischer grosschenn Zuvorsetzenn vnnde sulche Suma geldes dem obgemeltenn gestiffte Im heyligenn creutze
Zuentphendenn nach Zuentphendenn Nu vnnde Zu ewigenn Zeiten Vnsers herrn koniges lehenn vnde rechtenn
vnschedlichenn mit vrkundt diß brieffes vorsigelt, mit vgnantenn vnsers herrn koniges anhangende Ingesigell
des hier vonn seinetwegenn als eyn haubtmann In den obgemeltenn furstenthumben wir habenn vnde furden gebrauchenn
Geschenn vnnde gegebenn Zur Schweidnitz Nach cristi geburt funfftzehenhundert darnach Im dreyzehendenn Jarenn
Sonobendts nach lucie dabey sint gewest dy Erbarn Namhafftige Herman Zetteritz vffem kynßberge, asse Boberg
vff schomaw, heintze Czirn Zu ruderßdorff vnnde der Wolnamhafftige Ernst Schoff vonn knaste Cantzler
Zur Schweidnitz der dyßenn brieff gehabtt hat Im befehlunge :