Ich Johann vonn Swanburgk des Ordens der Ritterschafft des lieben s(an)nte Johannes vonn Jherusalem Bruder
meyster der priorat zcu Behemenn Mehern vnnd Slesienn off Strakonitz gesessin Bekenne offinlich mit disem
brieffe allen dy en sehin horen adir lesin das der namhafftige E(r)re Johannis vonn Sebenitz mein stadheller vnnd comptor
zcu olzem (et)c(etera) mein lieber bruder einel volkomliche richtunge gemacht hodt czwischenn den Erbarn vnnd namhafftig(en)
E(r)rn wentzlaw Remsburge Comptor zcu tintz ann eyme vnnd E(r)re Johann hundt von nawendorff Comptor zcu Briegaw
lichtenaw des and(er)n teiles meinen liebin brudern Also vornemlich(e)n das der gnante E(r)re Johannes hundt dem gnant(e)n
E(r)ren wentzlaw Remsburge adir seynen nochkomern Comptor zcuu Tyntz zcu einer wedersatuge sal gebin zwee hundet
gutte vng(er)ische guld(en) vor das forwergk gnant Slowenaw ym myntzer weichbilde gelegin Szo der gnant
E(r)re Johannis hundt adir seyne nochkomende Comptor zcu lichtenaw das gut lossaw mit synen zugehorungenn
haldenn vnnd besitzen wern vnnd wenn der gnante E(r)re wentzlaw Remsberg adir seyne nochkom Comptorn zcuu
zcuu Tyntz dy gnante suma der czweyh(un)d(er)t nicht gestellit Sal der gnante E(r)re Johannis hundt adir seyne noch
komern Comptor zcu lichtenaw ierlichen czwenczig vng(er)ische guld(en) off dem tag s(an)nte michels vnnd off dem
nehst(e)n obir eyn Jor bey der phandnuge gebin vnnd richtenn dem gnant(e)n E(r)ren wentzlaw Remsburge adir seynen noch
komedenn Comptorn zcuu Tyntze Auch magk der gnante E(r)re Johannis hundt adir seyne nochkom x guld(en)
vor hundert guld(en) abelosen vnnd abir czehn vor hundert guld(en) alleyne wenn ehr adir seyne nochkomen das
vor mogen vnschedelich vorfessin ginyen vnnd wenn sulche abelosunge der zweer hundert guld(en) gcleget vnnd
gnugklichenn abegelost word(e)n ist Szo sal der Comptor zcuu Tyntz da zcu czeiten sein wirt mit rathe des
E(r)ren stadhellers der ouch zcu czeit(e)n sein wirt an legin an das hawss notdorff zcuu Tyntze woran is am be
quemlist(e)n dunckenn w(ir)t vnnd zcufromen komen moge dem hawse des zcu eyner grosser sicherheit habe
ich egnanter Johann vonn swanburgk mit sampt meynem liebin bruder E(r)re Hanns hundt vnser beyder
Jnsigel lossenn hengen An disin brieff der gegebin ist noch cristi geburt tausent vier hundert vnnd Jn dem
achtzigesten ior am tage laurencij des heyligenn mertheres