Wir Semowith von gotisgnadn herczog zu thesschin meister sent Johans ordn von Jerusalem Bekennen offentlich in
desim briue allen den dy en sehen horin adir lesin das wir vorlegin habn an len rechte panczen genant dushin
diner vnd Elizabeth sinir elichn hussfrawe vnd allen eirn erbn vnd rechte nochkomlinge vnsirn kreczem der
do gelegin ist in vnsirm hoffe czu der olsen uf dy linke hand als man uf den hofe get Also bescheidinlichn das
der selbe panczen vnd Elizabeth sine frawe vnd alle er erbn vnd recht nochkomlinge sullen gebn von dem selbn
kreczem alle Jar Jerlichn dry marg czinsis prag(er) grossen polnischer zal uf czwene tage uf sent michils tag vnd
uf alle sent walpurgin tage vnsirm comthuer do selbist czur olsen der iczunt ist adir czu czeitn wirt werdn den
selbn kreczem sulln dy egenanten panczen Else sin wip vnd ere erbn vnd nochkomlinge besiczen vorkawfen vor
wandiln haldn vnd habn czu tun vnd czu lozen vnd an aen nucz czu wendn das beste das se magen adir kinnen
Auch sulln des egenanten panczen vnd Elsen erbn vnd nochkomlinge czu czukunftigen czeitn dy len enphoen von
dem comthuer czur olsen der do iczunt ist vnd in czeitn wirt sin czur vrkunde vnsirs Ingesigils das wir han
lozin hengin an desin brif do smit by gewesit vnsir libn in gote brudir Johannes prior czur olsen czu czeitn fren
czil kumeister Boruth hofemeister hensil phugmeist(er) stephan bysschowsheym hensil kreamer herbort vns(er)
vndirsessin czur olsen vnd ist geschen am Sontag vor sent Margriten tag der heiligin Juncfrawen Noch gotis
geburt tusint Jar in dem funf vnd achczigisten Jare