Wir Ratmanne zcu Brige bekennen offintlichen mit diesem brieffe vor Jdirmanglichin das
das wir gesehen haben einen offin latinischen brieff off perement geschreben mit etwan des hoch
gebornen fursten herczoge heinrichs herren zu loben vnd zu nymptsch anhangendem Jngesigel
vorsigelt gancz vnd vnuorseret allinthalben den wir vnsern statschreiber dom latine getrew
lichen haben lossen vordewtzschen von worte zu worten eyns sulchen lawtes In gotis namen amen
wir heynrich von gotis gnaden herczog In Slesien herre zu loben vnd zu nymptsch Bekenen mit
lawte diesis brieffis allen kegenwortigen vnd zukunfftigen das wir mit wissen vnd fleissigen
rate vnser eldisten manne dorgedacht vmbe vnser vnd vnser lande grosser notdorfftikeit wille
rechte vnd redlich In eyme rechten namen eyns kowffs vnd vorkowffis vorkowfft habin vnd kegen
wortiglichen vorkewffen vnd bestetigen funff marg jerlicher gulde von aller beswerunge des ge
schosses vnd dinstis fray vnd awsgenomen In vnd off der helffte aller guter etwan vrbani von
Borsnitz seligen gedechtnissis dy her gehabit hat vnd besessen In deme dorffe kankaw vnsere
nymptzschischen weichbildis vnd off allen vnd iglichen derselben guter zugehorenden eckern holcz
tzen Bebbawen Bertenery fischen Bebungen czinsen fruchten rechten vnd obirkeit allen kegen
genczlichen awsgenomen wie was namen dy awsgesprochen mochten wrden vnd worane dy sinde
vnd zuseyn dinkant wrden welche guter an vns als an eynen worhafftigen vnd rechten leenhren
des genanten weichbildis noch tode des genanten vrbani von borsnitz zu leenrechter recht
vnd redelich komen sinde vmb funffczig marg prager grosschen polnischer czal vnd gewonlicher
muncze vns an gereitem gelde genczlich beczalt vnd an vnsern behegelichen nocz iezunder
genczlichen gewandt welch geldt funffczig marg dy erbar fraw agnes gelossene etwan Johis
weise burgere zcu brige guths gedechtnissis an eren vnd erer nochkomelinge heylbare zelen
zelikeit den geordenten mannen brudern vnd crewczigern In der olssen des ordens s(an)c(t)i Johis
von Jher(usa)l(e)m zu eyn stifftunge ein newen capellen des bildis der samesamen Juncfrawen marie dosel
bist In der olssen vnd zusteuer der diener der genanten capellen gunczlichin hat gegeben
gedygent vnd williglichen zu einem ewigen zelegewete fray gegeben denselben czins
funff marg zcu nuczen vnd zu allerforderst vor allen andern beczalungen vns adir den vnsern
dowon geborende In vnd off das fest sancti michahelis des erczengels vnd nu schir allernchiste fest
s(an)c(t)i michahelis obir ey jar anczuheben off welchen tag antwit dy niste beczallunge vnd also obirbas
alle jar jerlich sich stetiglichen nochenander erfolgende zugeben vnd zubeczalen vnd In das haws
olssen durch den schultzen vnd bebawer des genanten dorffis kankaw off ere schaden muhe
vnd koste zu antwirten den geordenten mannen brudern vnd crewczigern In der olssen des
ordens sancti Johis von Jherusalem vnd deme ganczen conent des ordens adir hawses vorge
nant vnd eren zuczeiten nochkomen zuhabin In eyme namen eynis wedirkowffis zuhalden zube
sitzen zcuvorkewffen zcuvorweckseln zcuvorgeben vnd an eren behegelichsten nocz als en das am all
besten vnd noczlichsten anszczelechten wt zcmachen zuwenden vnd awch ane rechtis pflege wenne
der genante czins funff marg zcurechter czeit nicht beczalet wrt mit vnsers landerec durch
dy pfendunge zufordern vnd mit den genomen adir nemenden pfanden zutun sich geboren gleich
weise als alle ordnunge des rechten domete wrt begangen awch sullen vns gonnen dy vorgenan
ten kewffer adir crewcziger In eren vnd erer zuczeiten nochkomen namen das wir vnd vnser geerben
vnd eliche nochkomelinge den genanten czins funff marg vmbe funffczig marg gleicher grosschen
als vorgeschreben stehit wedir abelosen mogen wenne wir komen In sulcher macht vnschedlich alle
wege deme vorstissen czinse vnd wir vorwor dy genanten funff marg czinsis als worhafftige
kirchen czinse In vnd off den genanten gutern zu kankaw den genanten brudern vnd crewczi
gern In der olssen des ordens sancti Johis von Jherusalem vnd den dienern der capellen der heiligen
Juncfrawen an deim vorgenant vorlyen haben Inegeawnt vnd vorschreiben durch dy kegen
wortigen setzende vnd bestetigende dieselben crewcziger der genanten funff czinsis worhafftige
vnd rechte besitzer vnd das es nicht als gar eyn sulchis heylbar testament der agnes was synne
aws zukunfftigen geczeiten vorgessen wrde wellen wir das seyn gedechtnisse von den brudern adir
crewczigern des genanten hawses olssen In allen eren gutigen amechten ewiglichen sal gehabit
wrden wir wellen awch das adir wenne der genante czins abgelost wrde das das hawptgelt
In den heiligen kewsern des genanten hawses olssen zugetrawer hant sal gelegt wrden also lange
bis das ander also gewisse czinse off gewissen eckern vnd gutern vmb das genante geldt
gekowfft wrden In welchis dingis geczeugnisse vnd grossim gedechtnisse aller vorgenanten dinger
ist vnser sigil kegenwortiglichen angehangen gescheen vnd geben zur olaw am nehisten dinstage
vor deme tage sancti mathei ap(osto)li vnd ewangeliste noch xpi geburt tawsende vierhundert 1402
vnd In dem andern Jaren In kegenwortikeit vnser liben getrawen conrado borsnitz lewther
schellendorff heynric schonefeldt george krosse Johane foltwiche nicolas schellindorff
vnd vincencz Jastken vnsern schreiber der diese sachen In befelunge hatte zcu woran bekent
nisse habin wir obgeschreben ratmane vnser sigel an diesen brieff lossen druken der gegebin ist vnd
geschreben des nehisten sonnobindis vor martini anno d(omi)ni m(illesim)o cccc(esim)o ij